Fota racyja.com.

Fota racyja.com.

«Dzieciuki» na siońnia apošni hurt u Biełarusi, jaki maje prablemy z vystupami. Čamu, na Vašu dumku, vas tak vyłučajuć?

Aleś Dzianisaŭ: Pa ščyraści, mienš za ŭsio chaciełasia b razmaŭlać pra zabarony. Nadakučyła. Nam nie patrebny hety čorny pijar.

Tak, šmat miescaŭ, dzie nie adbylisia kancerty, ale jość rehijony, dzie my možam vystupić i vystupali. Tatalnaj zabarony niama.

Viedajecie, našy niedziaržaŭnyja ŚMI pra tak zvanyja «čornyja śpisy» pačali pisać, kali heta kranuła rok-zorak. A kali być ščyrymi, to «čornyja śpisy» isnavali z kanca 90-ch. Pamiataju, jak Stas Pačobut z haradzienskaha pank-hurtu Deviation płanavaŭ stvaryć mapu Biełarusi z paznakami tych haradoŭ, dzie byli sarvanyja kancerty ich kamandy.

Na jakich placoŭkach vystupajecie ŭ Biełarusi?

AD: Jany byli roznyja: i haražy, i pryvatnyja ahrasiadziby, i kłuby. U niekatorych haradach na nas dajuć «hastrolki».

Čym «Dzieciuki» roźniacca kanceptualna ad byłych kalehaŭ pa «čornym śpisie»: Brutto, Lavona Volskaha?

AD: Pryčyny zabaronaŭ pryblizna adnolkavyja. Z druhoha boku,

my adroźnivajemsia tym, što kožny z «dzieciukoŭ» dzieści pracuje, i my nie zarablajem muzykaj na žyćcio. Tym samym my nie pryviazanyja da kolkaści kancertaŭ i hanararaŭ za ich. U sučasnych biełaruskich umovach, heta nam raźviazvaje ruki ŭ niejkaj stupieni. Prynamsi, idei schadzić na pryjom da mienskich ideołahaŭ u nas nie ŭźnikała.

Chto z vašych muzykaŭ dzie pracuje?

AD: My: elektryk, videaapieratar-fryłansier, santechnik, ekanamist, drukar, indyvidualny pradprymalnik, prafiesijny muzyka. Śpiektr raznastajny:)

Vy vydali svoj albom «Karotkaja historyja Biełarusi» na dyskach: ci jość u hetym kamiercyjny sens u naš čas?

AD: Kamiercyjnaha sensu nie było. Z prodažu dyskaŭ chaciełasia niejak dapamahčy Čobatu. Aleś Mazanik (imbryk.by) całkam za ŭłasnyja hrošy vydaŭ albom. Častku nakładu ja zabraŭ sabie i toje, što pradajecca ŭ mianie - pajšło i pojdzie Alesiu Čobatu.

Aleś Čobat — heta haradzienski paet, jon straciŭ zrok i žyvie adzin u Skidzieli ŭ pryvatnym domie.

U materyjalnym płanie žyćcio jaho ciapier palepšyłasia. Nakolki ja viedaju, letam byŭ zrobleny kaśmietyčny ramont dachu. Paramantavali i hanak. Jura Siedzianieŭski ci spadarynia Danuta Bičel pieryjadyčna jedziać dapamahać pa haspadarcy. Šmat ludziej dapamahło hrašyma, kali pravodziłasia tałaka pa zboru srodkaŭ na dapamohu paetu. Jość adzinkavyja prykłady, kali ludzi nie afišujuć.

Naŭrad ci chto viedaje, što spadarynia Śviatłana Aleksijevič kožny miesiac pieraličvaje Čobatu 100 rubloŭ sa svajoj Nobieleŭskaj premii. U mianie źjaviłasia nahoda i mahčymaść pra heta skazać. 

Na słovy Čobata napisanyja mnohija Vašy pieśni. Ci pracujecie jašče z kimści z paetaŭ?

AD: Kali brać hurt, to ŭ nas jość svoj ułasny paet - Dzianis Žyhaviec. Praŭda, u apošni čas jon mała piša, tamu na novym albomie, piesień na jahonyja vieršy budzie niašmat.

Budzie bolš piesień na maje teksty, ale ja nie liču svaju tvorčaść paezijaj.

Było adzinkavaje, ale cikavaje i plonnaje supracoŭnictva z paetam i pierakładčykam Andrejem Chadanovičam. Kali nam prapanavali paŭdzielničać u mižnarodnym trybjucie na hurt The Pogues, to paŭstała pytańnie ź pierakładam pieśni «Streams Of Whiskey». Ja źviarnuŭsia da spadara Andreja, i jon prapanavaŭ zrabić nie dakładny pierakład, a ź biełaruskim kantekstam. Voś čamu źjaviŭsia ŭ vynikovym teście Hiervasij Vylivacha dy inšyja pryšpilnyja kala-biełaruskija momanty. Chtości potym napisaŭ, što irłandcy adkrucili b nam hałavu, bo ŭ pieśni ŭzhadvajecca šatłandski viski «Johnnie Walker», ale my akurat stavimsia da takich rečaŭ z humaram.

Pačaŭ składacca cykł piesień na vieršy Uładzimira Karatkieviča. Napeŭna, zapišu jašče adzin solnik. Adna ź piesień na vierš «Nadpis na kamieńni nad krynicaj» budzie na trecim albomie hurtu Dzieciuki.

Prabačcie, heta asabistaje, kaniečnie, ale mnie Dzieciuki časam nahadvajuć Dropkick Murphys dy Flogging Molly…

AD: Razumieju pra što vy. Ale, pa-pieršaje, tak zvany kielcik-pank ci ajryš-pank - heta źjava mižnarodnaja, i cikavaja nie tolki irłandcam ci amierykancam. U Varšavie na adnoj scenie my łabali z kitajskim ajryš-pank-hurtom. Chto b moh padumać?! A jany łabali tak, što pazajzdrościać u Bostanie!)))

Pa-druhoje, my nikoli siabie nie pazycyjanavali, jak ajryš-pank-kalektyŭ. My nie admaŭlajem upłyvu, ale dla nas važniej elemienty, a nie forma całkam. My śpiavajem pra svajo. U papiarednich albomach - bolš pra historyju, u novym - bolš pra sučasnaść, ale Biełarusi, a nie Irłandyi.

U našych płanach - źviarnucca i da tradycyjnych biełaruskich matyvaŭ. Heta było b naturalna. Ale pieratvaracca ŭ taki biełaruski narodna-fołkavy kalektyŭ z elemientami panka, nie chaciełasia by. Biełaruskich kala-fołkavych hurtoŭ u nas chapaje: ad narodnych da mietalistyčnych. Chapaje i vykanaŭcaŭ, jakija śpiavajuć, naprykład, pra historyju Biełarusi. Daloka nie ŭsio nam padabajecca, bo čaściej, - heta ci ślaźlivaje skavytańnie, ci źviaryny pafas. A my b chacieli, kab našaja muzyka hučała viesieła, pazityŭna i z humaram.

Jakija pieśni «Dzieciukoŭ» Vam asabista padajucca samymi ŭdałymi?

AD: Budučyja.

Vy haradziency, padkreślivajecie heta. Što dla Vas układajecca ŭ paniatak haradzienskaści?

AD: U hetym niama notak sieparatyzmu ci šavinizmu. Mnie asabista šmat jakija harady padabajucca, ale svaim liču mienavita Harodniu. I mnie chaciełasia b niejak bolš papularyzavać svaju małuju radzimu. Na kožnym kancercie za miažoj my kažam, što my - ź Biełarusi, z samaha fajnaha horada na śviecie!

Dla kahości takim horadam budzie Połack, dla kahości - Mahiloŭ. My nie budziem spračacca. Treba šukać toje, što nas pajadnoŭvaje, a nie padzialaje. Pa vialikim rachunku, horad - heta nie tolki architektura i minułaje. Horad - heta jašče i ludzi, i sučasnaje!

Dla mianie stapracentovym haradziencam budzie luby čałaviek, jaki pryjechaŭ u moj horad, lubić jaho, cikavicca jahonaj historyjaj, pavodzić siabie z pavahaj da «abaryhienaŭ».

Jakim u ideale bačycie miesca Harodni na kulturnaj mapie Biełarusi? Što treba, kab dasiahnuć hetaha miesca?

AD: Mnie ciažka adkazać, bo ja ž nie čynoŭnik ci biznesoviec. U mianie niama niejkich miechanizmaŭ upłyvu. Ale što ja baču:

u Harodni - vializarny kulturnicki i aśvietnicki patencyjał. Na ekskursijach pa našym horadzie možna raspavieści amal pra ŭsiu historyju Biełarusi. Horad musić stać turystyčnaj biełaruskaj «miekkaj» žycharoŭ Biełarusi i zamiežnikaŭ.

Harodnia moža stać polskim Krakavam ci litoŭskaj Vilniaj. Treba pašyrać admysłovuju infrastrukturu.

Adnymi zamkami dy kaściołami turystaŭ nie zaciahnieš. Mušu adznačyć i stanoŭčyja kroki. Naprykład, za apošnija paru-trojku hadoŭ, paviačiłasia kolkaści pabaŭ i kaviarniaŭ, dla zamiežnikaŭ stvaryli piacidzionny biaźvizavy režym. Vielmi dobra, ale heta - kropli ŭ akijanie.

A kali kazać pra ludziej, to chaciełasia b bačyć bolš ščaślivych haradziencaŭ, kab jany bolš uśmichalisia, bolš kamunikavali pamiž saboj.

I tut haradziency ničym nie adroźnivajucca ad žycharoŭ inšych haradoŭ Biełarusi. Mabyć tolki vałodańnie polskaj movaj na pobytavym uzroŭni daje niejkija prefierencyi na zakupach u Polščy:)

U cełym, ludzi stali bolš sumnymi, zacisnutymi, navat azłoblenymi. I sprava nie tolki ŭ ekanamična-palityčnych realijach. Časam nie chapaje prosta humaru i samaironii…

U vas mocnaje fanackaje koła. Ci kamunikujecie z fanatami pa-za kancertami?

AD: Kaniečnie, kamunikujem! Mnie navat składna ich nazvać fanatami, bo fanaty hurtu - heta termin ź niejkaj tupavataj papsy. My stavimsia da ŭsich našych amataraŭ, jak da pryjacielaŭ dy siabroŭ.

Niama takoha, što my pryjechali, začynilisia dzieści ŭ pakojčyku, adłabali, razdali aŭtohrafy, sieli ŭ bus i źjechali. Z nami možna pahutaryć, vypić piva.

Zrazumieła, što ludzi roznyja: chtości, naprykład, saromiejecca padyjści, z kimści niama pra što parazmaŭlać. Ale heta redka.

Nam składana paraŭnoŭvacca z kołam amataraŭ Sieriohi ci Alaksandra Saładuchi, ale my i nie źbiraliś hetaha rabić! My vyjšli z andehraŭndu i praciahvajem dekłaravać jahonyja najlepšyja pryncypy: svaboda, roŭnaść, braterstva, uzajemadapamoha, uzajemapavaha.

Usie hetyja šou-biznesaŭskija štučki, kštałtu: kolkaść prahladaŭ u necie, kolkaść padpisčykaŭ, chto pierad kim vystupaje, u kaho hanarar bolšy - heta ž usio łuchta, nasamreč!

Heta nie moža źjaŭlacca dla nas samametaj)))

Ci zapisvajecie štości novaje ciapier i ci pakažacie na «Partyzan-roku» ŭ Biełastoku?

AD: Da zapisu jašče nie dajšli. Novy materyjał jašče dapracoŭvajecca, ale paru piesien my ŭžo «zaśviacili». Ich i zaśpiavajem.

* * *

Hurt Dzieciuki možna budzie pačuć 28 kastryčnika ŭ Biełastoku, u Ladovym pałacy (Lodowisko BOSiR, ul.11 Listopada 28).

Taksama partyzanski muzyčny atrad budzie papoŭnieny ŭkrainskim hurtom Kozak System, a z boku Polščy dałučycca bieskampramisny Kult na čale ź jaho niaźmiennym lidaram — Kazikam Stašeŭskim.

Kult dla palakaŭ — heta jak «Mašyna času» i «DDT» dla postsavieckaha słuchača. Hurt byŭ utvorany ŭ 1982 hodzie ŭ Varšavie. Ich pieśni skiravanyja suprać «sistemy» — ci to heta aparat kamunistyčnaj ułady, ci to carkoŭnyja instytuty, ci to psieŭdademakratyčnyja lidary, ci to karparacyi, jakija razburajuć śviadomaść i vychoŭvajuć u ludziach prahu nažyvy, ehaizm i biazdušnaść.

Kozak System - ukrainski rok-hurt, jaki pastajanna pradstaŭlaje krainu na jeŭrapiejskich i suśvietnych muzyčnych fiestyvalach. Jon byŭ zasnavany ŭ 2012 hodzie ŭ Kijevie z muzykaŭ, jakija vyjšli sa składu hrupy «Hajdamaki». U 2013 «kazaki» stali tvaram Jeŭramajdanu, jany niesychodzili sa sceny, i brali niepasredny ŭdzieł u padziejach Ukrainskaj revalucyi, zaklikajučy ŭkraincaŭ nie być abyjakavymi da budučyni krainy.

Kvitki na «Partyzan-rok» u Biełarusi pradalisia, ich možna nabyć u Polščy na sajcie apieratara eventim.pl.

Padrabiaznaści — na sajcie muztur.by ci pa telefonie +375 25 526 84 14.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?