Hałoŭny redaktar «Sovietskoj Biełoruśsii» Pavieł Jakubovič vystupiŭ z prahramnaj zajavaj u «Kłubie redaktaraŭ» na «Biełaruś-1», zaklikaŭšy abmiarkoŭvać žyćcio Biełarusi, a nie rasijskija historyi.
«Čas nam, hramadzianam Biełarusi, mienš žyć žyćciom inšaj dziaržavy. Što nam hetaja hniusnaja historyja vakoł filma «Macilda»? Usie hetyja zvarjaciełyja baraćbity, vajaŭničyja kryžaki… Nam heta navošta? U nas hetaha niama i być nie pavinna. Što nam historyja z hetaj Sabčak? …
Da čaho ja zaklikaju? Usie my, hramadzianie Biełarusi, pavinny ŭsio bolš i bolš razumieć, što ŭžo 25 hadoŭ my — niezaležnaja jeŭrapiejskaja dziaržava. A my ŭsio žyviom drobnymi žarściami niejkich maskoŭskich akcioraŭ, niejkimi skandalčykami, niejkimi Sabčak.
Davajcie žyć biełaruskim siońnia i tut. U nas adbyvajucca nie takija hłabalnyja i skandalnyja padziei, ale my žyviom svaim žyćciom, kab zrabić naša žyćcio narmalnym … Ja hatovy havaryć pra kaleh Labiedźku, Statkieviča i inšych z našmat bolšaj cikavaściu, čym historyi Sabčak, naradžeńnie ci hibiel niejkaj zorki ŭ Rasii. My pavinny ŭrešcie razumieć, što my kraina».
Takim čynam Jakubovič adreahavaŭ na prapanovu staršyni Biełteleradyjokampanii Hienadzia Davydźki abmierkavać mahčymy ŭdzieł Ksienii Sabčak u prezidenckich vybarach u Rasii, a taksama razvahi kiraŭnicy chołdynha «Minsk-Naviny» Kaciaryny Dubinskaj pra śmierć artysta Dźmitryja Marjanava i prablemy ŭ siamji Armena Džyharchaniana.
***