Choć na kančatkovaj prymirenčaj šyldzie i niama nadpisu, što pieršapačatkova byŭ zadumany [«Vydatnamu synu Biełarusi ad udziačnych suajčyńnikaŭ»], na ŭračystaści z nahody adkryćcia pomniku jon usio ž źjaviŭsia.
Nahadajem, z čaho pačałasia ŭsia šura-bura. 9 kastryčnika namieśnik staršyni Asacyjacyi biełarusaŭ Šviejcaryi Aleś Sapieha paviedamiŭ, što pad upłyvam polskaha ambasadara ŭ Biernie Jakuba Kumacha źmiest šyldy na pomniku Tadevušu Kaściušku mocna skaracili. Ź jaho prybrali biełaruskamoŭnuju viersiju i vykraślili radok pra «vydatnaha syna Biełarusi», pakinuŭšy tolki imia, daty žyćcia i ścipłaje «Pastaŭleny Asacyjacyjaj biełarusaŭ Šviejcaryi ŭ 2017 hodzie», napisanaje pa-niamiecku. Pryčym biełaruskaja asacyjacyja pisałasia jak «Weissrussischen Vereinigung».
Paśla taho, jak ŚMI ŭźniali šum vakoł hetaj historyi, u pieramovy z meram Załaturna ŭklučyłasia biełaruskaje MZS, jakoje paśpiachova zdoleła ŭłahodzić kanflikt. Kampramisny varyjant šyldy vyhladaje tak:
«Tadevuš Kaściuška. 1746—1817. Ad Biełaruskaha abjadnańnia ŭ Šviejcaryi. 2017 hod» pa-biełarusku i niamiecku. Pryčym u niamieckim varyjancie biełaruskaja asacyjacyja pišacca ŭžo jak Belarussische, a nie Weissrussische.
Reakcyjaj biełarusaŭ na kanflikt u Załaturnie było pačać zbor srodkaŭ na pomnik Kaściušku ŭ Biełarusi, u Mieračoŭščynie, dzie jon naradziŭsia. Na zaklik Hleba Łabadzienki adhuknulisia ŭžo 450 čałaviek. Siońnia sabrana bolš za 12 tysiač rubloŭ, adnak nieabchodna jašče 5 tysiač [achviaravać možna tut].
Aleś Sapieha pobač z pomnikam Tadevušu Kaściušku ŭ Załaturnie.
