Dziaržaŭny departament ZŠA apublikavaŭ śpis z 39 rasiejskich kampanij i arhanizacyj, jakija mohuć padpaści pad sankcyi ZŠA, paviedamlaje radyjo «Svaboda».

Siarod ich kampanija «Ałmaz-Antej», kancern «Kałašnikaŭ», Federalnaja słužba biaśpieki (FSB), Słužba źniešniaj vyviedki, Hałoŭnaje vyviedvalnaje ŭpraŭleńnie Hienieralnaha štaba (HRU). Havorka idzie pra arhanizacyi, jakija majuć dačynieńnie da rasiejskaj vyviedki i abarony.

Raniej paviedamlałasia, što Dziaržaŭny departament ZŠA praciahvaje «pracavać nad zakanadaŭstvam, pryniatym Kanhresam u lipieni, pra ŭzmacnieńnie sankcyj suprać Rasiei». Pra heta zajaviła pres-sakratar Chizer Nojiert 24 kastryčnika, adkazvajučy na pytańnie, čamu administracyja prezydenta Donalda Trampa prapuściła termin, ustanoŭleny dla ŭvasableńnia ŭ žyćcio zakanadaŭstva ab sankcyjach suprać Rasiei, jakoje prezydent padpisaŭ tolki 2 žniŭnia.

Zakon nakiravany na abmiežańnie suprać urada prezydenta Rasiei Ŭładzimiera Pucina za jaho mierkavanaje ŭmiašalnictva ŭ prezydenckija vybary ŭ 2016 hodzie ŭ ZŠA, ahresiju va Ŭkrainie i padtrymku prezydenta Siryi Bašara Asada.

Zhodna z zakonam, administracyja Trampa pavinna była vypuścić da 1 kastryčnika instrukcyju pra toje, jak varta ŭžyvać sankcyi, uklučajučy śpis asobaŭ i arhanizacyj, jakija majuć dačynieńnie da rasiejskaj vyviedki i abarony.

Клас
Панылы сорам
Ха-ха
Ого
Сумна
Абуральна