U Biełarusi płanujuć adkryvać himnazičnyja kłasy ŭ zvyčajnych škołach, paviedamiŭ karespandentu BiełTA ministr adukacyi Ihar Karpienka.

«Treba dać mahčymaść škołam adkryvać himnazičnyja kłasy pa adpaviednych napramkach dziejnaści. Jany pavinny aryjentavać na budučuju prafiesiju», — skazaŭ Ihar Karpienka. Jon udakładniŭ, što havorka idzie pra 10-ja i 11-ja kłasy. U hetym vypadku źjavicca dadatkovaja mahčymaść atrymlivać himnazičnuju adukacyju ŭ tych školnikaŭ, jakija chacieli b praciahnuć navučańnie na pavyšanym uzroŭni paśla 9-ha kłasa ŭ svajoj ahulnaadukacyjnaj škole.

Ministr taksama padkreśliŭ, što himnazii jak typ ustanovy adukacyi zachavajucca. Jak i zvyčajnyja škoły, jany buduć realizoŭvać prahramu pačatkovaj i bazavaj adukacyi, dalej vyvučeńnie pradmietaŭ budzie vieścisia na pavyšanym uzroŭni - heta 10-ja i 11-ja kłasy. U tym liku havorka pra heta išła na Respublikanskaj piedahahičnaj radzie.

«My ličym, što adbor dla vyvučeńnia pradmietaŭ na pavyšanym uzroŭni pavinien ažyćciaŭlacca paśla 9-ha kłasa - navučeniec pavinien zrabić svoj śviadomy vybar», - adznačyŭ Ihar Karpienka.

Adpaviedna ustupnyja ekzamieny ŭ 5-ja kłasy himnazij admieniać, zamiest hetaha adbor u himnazii i himnazičnyja kłasy prapanujecca ažyćciaŭlać pa vynikach atestacyi za kurs bazavaj škoły.

Pa słovach ministra, dla realizacyi hetych płanaŭ nieabchodna ŭnosić źmieny ŭ adpaviednyja narmatyŭnyja pravavyja akty. «Dumaju, što heta vielmi blizkaja pierśpiektyva. Jak tolki budzie raspracavany narmatyŭny akt, my pra heta paviedamim. Chutčej za ŭsio, u nastupnym hodzie my ŭžo abydziemsia biez ekzamienaŭ u piaty kłas», - adznačyŭ Ihar Karpienka.

Jon dadaŭ, što baćkam i piedahahičnym kalektyvam nie varta chvalavacca. Narmatyŭny pravavy akt adrehuluje ŭsie pytańni. Razam z tym užo siońnia u školnikaŭ u lubym kłasie jość mahčymaść vyvučać pradmiety na pavyšanym uzroŭni. Dla hetaha pracujuć fakultatyvy, hurtki, jość sistema dadatkovaj adukacyi.

Što da takoha nie mienš aktualnaha pytańnia, jak čas pačatku zaniatkaŭ u škołach, Ihar Karpienka adznačyŭ, što ŭ cełym pytańniaŭ z hetym nie ŭźnikaje. Ministerstva pastajanna manitoryć situacyju. «Kali prezident naviedvaŭ adnu sa škoł Minska, ja dakładvaŭ, što bolš za 80% škoł hatovy pierajści na pačatak zaniatkaŭ z 9 i 8.30. Adnak zastaniecca niejki pracent škoł, jakija buduć pracavać z 8.00. U pieršuju čarhu heta tyja ŭstanovy adukacyi, jakija pracujuć u dźvie źmieny abo dzie naładžana peŭnaja schiema padvozu vučniaŭ «, - adznačyŭ ministr.

Клас
Панылы сорам
Ха-ха
Ого
Сумна
Абуральна