Na biznes-forumie «Uschodniaha partniorstva» ŭ Talinie adzinym dakładčykam ad Biełarusi akazaŭsia eks-kiraŭnik Parka vysokich technałohij Valeryj Capkała. Karespandent tut.by vyrašyŭ daviedacca, čym zaraz zajmajecca stvaralnik biełaruskaj «Silikonavaj daliny».
Fota: Darja Burakina dla probusiness.by.
2 sakavika Valeryj Capkała byŭ vyzvaleny ad pasady dyrektara dziaržaŭnaj ustanovy «Administracyja Parku vysokich technałohij», jakuju ŭznačalvaŭ z momantu stvareńnia ŭ 2005 hodzie.
Na forumie ŭ Talinie eks-kiraŭnik biełaruskaha IT-cudu byŭ pradstaŭleny jak biznes-kansultant. U hutarcy z karespandentam jon skazaŭ, što nie pryviazany da adnaho miesca pracy, vystupaje ekśpiertam i zajmajecca kansałtynham.
Uletku źjaviłasia infarmacyja, što Valery Capkała kansultuje ŭłady Uźbiekistana pa raźvićci IT-siektara. U hetym hodzie prezident Uźbiekistana Šaŭkat Mirzijojeŭ rasparadziŭsia stvaryć u krainie Inavacyjny centr pa padtrymcy raspracoŭki i ŭkaranieńnia infarmacyjnych technałohij Mirzo Ulugbek Innovation Center.
Capkała paćvierdziŭ, što ŭrad Uźbiekistana prajaviŭ cikavaść i zaprasiŭ jaho padzialicca dośviedam. Adnak ad inšych kamientaroŭ admoviŭsia.
Jak adznačyŭ Valeryj Capkała padčas vystupu ŭ Talinie, «našym krainam na praciahu 5—10 hadoŭ treba ŭzhadavać IT-siektar, potym hety rynak budzie vielmi składanym dla ŭvachodu, jakimi ciapier źjaŭlajucca aŭtamabilebudavańnie i farmaceŭtyka». Biełarusi «pašancavała, što 10 hadoŭ tamu jana vyjšła na hety rynak». «Tady, hruba kažučy, jašče i mabilnych telefonaŭ nie było, a kampjutary byli vielmi darahimi. Ale heta byŭ adziny siektar, dzie možna było kankuravać z toj ža Hiermanijaj. Dla vychadu na IT-rynak patrebny tolki kampjutar. A ŭ astatnim vy spaborničajecie mazhami. Try słupy pośpiechu IT u Biełarusi: adukacyja, adukacyja i jašče raz adukacyja», — ličyć eks-kiraŭnik PVT.
