U Kijevie kala budynka Viarchoŭnaj Rady prajšło vieča, arhanizavanaje Michaiłam Saakašvili. Na płoščy pierabyvała kala tysiačy čałaviek.
Lidar «Ruchu novych sił» Saakašvili zaklikaŭ ludziej zapoŭnić apytalny list z pašyranym śpisam patrabavańniaŭ, siarod mahčymych punktaŭ jakoha - pryniaćcie zakona ab impičmiencie prezidenta, daterminovyja vybary prezidenta i Viarchoŭnaj Rady.
«7 listapada daju apošni raz im (uładam - red.) pryniać našy patrabavańni», - zajaviŭ Saakašvili.
«My nie možam tut stajać viečna. Nas pavinna być u 100 razoŭ bolš i my pavinny znajści inšyja mirnyja formy, čym prosta pražyvańnie ŭ ich pad voknami», - dadaŭ jon.
Taksama Saakašvili zajaviŭ, što ŭžo abskardziŭ u sudzie zahad Parašenki ab pazbaŭleńni jaho hramadzianstva.
Pavodle padlikaŭ palicyi, udzieł u viečy ŭziali kala 400 čałaviek, paradak achoŭvajuć kala 700 pravaachoŭnikaŭ.
17 kastryčnika kala Viarchoŭnaj Rady startavała akcyja «Usieŭkrainski zbor» za vialikuju palityčnuju reformu. Udzielniki patrabujuć pryniać zakony ab abmiežavańni deputackaj niedatykalnaści, stvareńni antykarupcyjnaha suda i hałasavańnia pa adkrytym śpisach.
Saakašvili i jaho «Ruch novych sił» dałučylisia da akcyi.
19 kastryčnika jany i nardepy ad «Samapomačy» vyrašyli praciahvać pratestnuju akcyju pad parłamientam, astatnija ŭdzielniki z akcyi vyjšli.
Pad Radaj arhanizavali vajenny łahier i zajavili pra ŭltymatum prezidentu Piatru Parašenku z patrabavańniem unieści ŭ parłamient zakony ab Antykarupcyjnym sudzie i impičmiencie.
22 kastryčnika na płoščy Kanstytucyi kala VR adbyłosia jašče adno vieča z udziełam Saakašvili i inšych aktyvistaŭ.
24 kastryčnika lider partyi «Ruch novych sił» Michaił Saakašvili zajaviŭ, što pieramiaščajecca na płošču pad Radaj da pratestoŭcaŭ i zaklikaŭ lidaraŭ apazicyi dałučycca da jaho.
