Reuters.com
Biełhidramiet abviaściŭ aranžavy ŭzrovień niebiaśpieki na paniadziełak i aŭtorak. Tak siońnia paryvy vietru ŭ bolšaści rehijonaŭ krainy mohuć dasiahać 15—22 m/s, a ŭ niekatorych rajonach da 24 m/s.
Siońnia pa ŭsioj terytoryi krainy čakajucca daždžy, u tym liku ŭ Minsku, uviečary mokry śnieh. Viecier paŭnočna-zachodni, maksimalnaja tempieratura pavietra — +3—5 hradusaŭ.
Urahan «Hiervart» (palaki jaho nazvali «Hžehaž») užo pahaspadaryŭ nad Hiermanijaj, Čechijaj i Polščaj, što pryviało da spynieńnia ruchu transpartu, pavalenych drevaŭ, niekalki čałaviek zahinuli.
U Niamieččynie 63-hadovy mužčyna patanuŭ padčas štarmavoha prylivu ŭ buchcie na Paŭnočnym mory, a jašče adna žančyna pamierła ŭ balnicy, kudy jaje dastavili paśla taho, jak jaje łodka pierakuliłasia z-za štormu ŭ pralivie na poŭnačy krainy.
U Bierlinie byŭ uviedzieny režym nadzvyčajnaj situacyi. Ad urahanu paciarpieŭ i horad Hamburh, centr jakoha zatapiła ŭ suviazi z mocnymi apadkami.
U Polščy ŭ suviazi z urahanam abvieščana 2-y ŭzrovień niebiaśpieki ŭ 10 vajavodstvach.
Zahinuli dva čałavieki: jany znachodzilisia ŭ aŭtamabilach. Na adnaho z kiroŭcaŭ ŭpała dreva, druhi ŭrezaŭsia ŭ dreva, jakoje lažała na darozie.
Akramia taho, viecier paškodziŭ abstalavańnie terminała zvadkavanaha pryrodnaha hazu u Śvinaujście na Bałtycy, adbyłasia nievialikaja ŭciečka hazu.
Ad urahanu bolš za ŭsio paciarpieli Vialikapolskaje, Pamorskaje, Zachodnie-Pamorskaje i Nižniesilezskaje vajavodstvy.
