Sud Hłybockaha rajonu pryznaŭ žurnalista Źmitra Łupača vinavatym pavodle artykułu 22.9 KaAP («Niezakonny vyrab pradukcyi ŚMI») za siužet «Hłybockuju zhuščonku dałučyli da zavodu, adkul usie ŭciakajuć», piša Radyjo Svaboda.
Materyjał byŭ pakazany na telekanale «Biełsat».
Staršyniavaŭ na pracesie sudździa Andrej Tarasievič, jaki pastanaviŭ pakarać žurnalista štrafam pamieram 35 bazavych vieličyń, abo 805 rubloŭ.
U videasiužecie pra hłybockuju zhuščonku ludzi skardzilisia na toje, što prybytkovy małočna-kanservavy kambinat dałučyli da stratnaha kambikormavaha zavodu. Rabotniki MKK niepakoilisia, što ŭ novaj intehravanaj struktury ŭ ich źniziacca zarobki — pra heta i havaryli na kameru.
Zavodziačy administracyjnuju spravu, milicyja vyznačyła asoby tych, chto davaŭ interviju, i vyklikała ich u jakaści śviedak. U sud taksama pryjšoŭ adzin z rabotnikaŭ. Jon zaśviedčyŭ, što davaŭ interviju i dadaŭ: dla «Biełsatu» hatovy havaryć jašče, bo kanał kaža praŭdu.
Źmitra Łupača sioleta ŭžo trojčy sudzili pavodle artykułu 22.9 KaAP i štrafavali za videasiužety, pakazanyja na «Biełsacie». Ale apošni štraf — samy vialiki.
U 2015 hodzie niezaležnaha žurnalista pakarali štrafam pamieram 25 bazavych vieličyń za artykuł, raźmieščany na sajcie «Eŭraradyjo».
