Dziaržabvinavaŭca paprasiŭ sud pryhavaryć byłoha namieśnika ministra pa nadzvyčajnych situacyjach Dźmitryja Biehuna, jaki abvinavačvajecca ŭ atrymańni chabaru, da 8 hadoŭ u kałonii ŭzmocnienaha režymu. Druhoha fihuranta spravy, biznesoŭca Alaksandra Hryca, jon prosić asudzić da bolš miakkaha pakarańnia — piaci hadoŭ abmiežavańnia voli biez nakiravańnia ŭ kałoniju, piša Tut.by.
Siońnia ŭ sudzie Zavodskaha rajona Minska pačalisia sprečki bakoŭ pa hučnaj spravie. Nahadajem, byłoha namieśnika ministra pa nadzvyčajnych situacyjach Dźmitryja Biehuna abvinavačvajuć pa č. 3 art. 430 KK «Atrymańnie chabaru». Pa viersii śledstva, eks-kiraŭnik uziaŭ chabar ad Hryca na 105 miljonaŭ niedaminavanych rubloŭ, 4 tysiačy denaminavanych rubloŭ i 5 tysiač dalaraŭ. Hrošy, jak praviła, pieradavalisia ŭ rabočym kabiniecie abo ŭ dvary doma Dźmitryja Biehuna. U čaćvier, 9 listapada, prakuror zapatrabavaŭ dla byłoha namieśnika ministra pa nadzvyčajnych situacyjach 8 hadoŭ pazbaŭleńnia voli z kanfiskacyjaj majomaści ŭ kałonii va ŭmovach ŭzmocnienaha režymu.
Sudovy praces doŭžyŭsia dva miesiacy. Za kratami razam z eks-čynoŭnikam apynuŭsia biznesmien Alaksandr Hryc, jaki i pieradavaŭ chabary. Jon pryznaŭ vinu ŭ poŭnym abjomie i raskazaŭ, što ŭvosień jaho, dyrektara budaŭničaj firmy, zaprasili ŭ kabiniet da Biehuna.
— Jon spytaŭ: «Chočaš sa mnoj pracavać?» Ja zrazumieŭ, što treba niešta prapanavać. Da hetaha mianie nichto nikoli nie zaprašaŭ da zaklučeńnia damovy. Ja napisaŭ na liście 3%, Dźmitryj Michajłavič pahladzieŭ, skamiačyŭ papieru i pacisnuŭ mnie ruku, — raspaviadaŭ u pieršy dzień dopytu ŭ sudzie abvinavačvany Alaksandr Hryc.
Dźmitryja Biehuna zatrymali na miescy złačynstva 19 sakavika 2017 hoda. Chabar u 5 tysiač dalaraŭ, pa słovach Hryca, były namieśnik ministra pa NS źbiraŭsia patracić na adpačynak u Hoa. Tolki hetuju sumu Biahun i pryznaje.
— Vinu ŭ tym, što atrymaŭ ad Hryca hrašovyja srodki ŭ pamiery 5 tysiač dalaraŭ, pryznaju ŭ poŭnym abjomie, — kazaŭ padčas dopytu ŭ sudzie Biahun.
Usio astatniaje jon admaŭlaje. Sankcyja artykuła, pa jakim jamu pradjaŭlena abvinavačańnie, praduhledžvaje ad 5 da 15 hadoŭ pazbaŭleńnia voli z kanfiskacyjaj majomaści.
Biznesoŭca Alaksandra Hryca abvinavačvajuć pa č.2 art. 431 KK «Davańnie chabaru». Jamu pahražaje da 7 hadoŭ pazbaŭleńnia voli, prakuror zaprasiŭ 5 abmiežavańnia voli.
