Palityk Aleś Łahviniec padčas «desantu» aktyvistaŭ «Dziei» ŭ Mazyr zaŭvažyŭ u sacyjalnych sietkach, što niepaŭnaletnija vychavancy Centra cyrkavoha mastactva «Arena» ŭ kancy kastryčnika brali ŭdzieł u spabornictvach u Łuhansku.
Mižnarodny fiestyval «Cyrkavaja budučynia» prachodzić nie ŭpieršyniu. Pierapynak rabiŭsia tolki na trahičny 2014 hod. U 2015 pradstaŭnikoŭ Biełarusi na feście nie było, letaś pradstaŭlali adrazu try kalektyvy, ale paŭnaletnich. Sioleta ž mazyrskaja škoła adpraviła ŭ «ŁNR» jašče dziaciej.
Biełaruś pradstaŭlali ŭ Łuhansku «Kanatachodcy-Kuźniacovy», u skład jakich uvachodziać Dźmitryj Salanik (22 hady), Andrej Sitnik (16 hadoŭ), Dzijana Sitnik (14 hadoŭ) i Viktoryja Bahrajonak (14 hadoŭ).
Takim čynam, biełaruskich dziaciej vyvieźli na spabornictva ŭ niepryznanuju dziaržavu, patencyjna niebiaśpiečnuju.
Varta adznačyć, što «Cyrkavaja budučynia» prachodzić u ramkach Humanitarnaj prahramy «pa ŭźjadnańni naroda Danbasa». Ładzić heta ŭsio Ministerstva kultury, sportu i moładzi «ŁNR».
U konkursie taksama brali ŭdzieł pradstaŭniki z Šviejcaryi, Italii, Bałharyi. Tolki dziela spraviadlivaści skažam, što ich vyvozili treniery — vychadcy z postsavieckaj prastory.
Biełaruskija dzieci paćvierdzili svoj vysoki kłas i zaniali pieršaje miesca, ale heta nie admianiaje taho faktu, što jany brali ŭdzieł u dastatkova sumniŭnych spabornictvach.
Mastacki kiraŭnik studyi «Arena» Maryja Kuźniacova skazała dla «NN», što «ničoha kiepskaha» ŭ Łuhansku jana nie zaŭvažyła. «Usio nie tak błaha», — adznačyła jana.
Dyrektar centra Natalla Dajneka ŭ svaju čarhu adznačyła, što dzieci jeździli ŭ Łuhansk niefarmalna. «Była zhoda baćkoŭ na vyjezd, jakija prablemy?» — adznačyła jana.
Na pytańni, jak cyrkačy dabiralisia da Łuhanska, jakija mohuć być nastupstvy hetaha vyjezdu i h.d. u administracyi «Areny» adkazvać nie zachacieli.