U sudzie Leninskaha rajona Bresta siońnia abviaścili prysud pa kryminalnaj spravie ab kamiercyjnym špijanažy, pieradaje BiełTA.
Fihuranty hetaj rezanansnaj spravy niezakonna atrymali źviestki pra technałohiju vytvorčaści smały i receptury farby, jakija vykarystoŭvajucca dla naniasieńnia darožnaj raźmietki i byli raspracavanyja i vykarystoŭvalisia pry vytvorčaści STAA «STiM Brest». Źviestki, jakija ŭjaŭlali kamiercyjnuju tajamnicu pradpryjemstva, jany źbiralisia pieradać zakazčyku z Rasii. U jakaści ŭznaharody fihuravała suma 1 miljon rasijskich rubloŭ (bolš za $15 tysiač).
Za atrymańnie infarmacyi fihuranty pieradali słužbovaj asobie pradpryjemstva ŭ jakaści chabaru $2,5 tys. Usiaho ž płanavałasia, što suma budzie ŭdvaja bolšaj. Mužčyny byli zatrymanyja pry pieradačy častki hrošaj u haradskim parku Bresta 31 lipienia supracoŭnikami šostaha ŭpraŭleńnia (pa Bresckaj vobłaści) hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS Biełarusi i AMAP.
Abvinavačanyja całkam pryznali svaju vinu i raskajalisia.
Siońnia sud pryznaŭ 48-hadovaha žychara Bresta i 41-hadovaha žychara Minska vinavatymi ŭ złačynstvach pa č.1 st.254 KK (kamiercyjny špijanaž), a taksama č.1 art.14 i č.2 art.431 KK (zamach na daču chabaru ŭ bujnym pamiery). Kančatkova im pryznačana pakarańnie ŭ vyhladzie abmiežavańnia voli biez nakiravańnia ŭ vypraŭlenčuju ŭstanovu adkrytaha typu terminam na dva hady i štrafu ŭ dachod dziaržavy ŭ pamiery 400 bazavych vieličyń (Br9,2 tys.).
Taksama z abodvuch fihurantaŭ ŭ salidarnym paradku ŭ dachod dziaržavy ŭ miesiačny termin budzie spahnany vartasny ekvivalent biespadstaŭna nabytaj vyhady ŭ pamiery Br528.
Majomaść asudžanych budzie znachodzicca pad aryštam da poŭnaj vypłaty štrafaŭ. Asudžanyja buduć adbyvać pakarańnie pa miescy žycharstva. Miera strymańnia da ŭstupleńnia prysudu ŭ zakonnuju siłu zastałasia raniejšaj — padpiska ab niavyjeździe i adpaviednyja pavodziny.
Prysud nie ŭstupiŭ u zakonnuju siłu i moža być abskardžany i apratestavany ŭ apielacyjnym paradku.
Akramia taho, sud vynies pryvatnuju pastanovu, u jakoj źviarnuŭ uvahu kiraŭnika STAA «STiM Brest» na aktyŭnuju hramadzianskuju pazicyju i pravavuju śviadomaść rabotnika pradpryjemstva, aktyŭnyja dziejańni jakoha spryjali raskryćciu złačynstva i vykryćciu vinavatych asob.
