Staršynia Partyi BNF Ryhor Kastusioŭ padzialiŭsia z «Našaj Nivaj» uražańniami ad udziełu ŭ pieradačy «Naša žyćcio» na telekanale ANT, pryśviečanaj aśviatleńniu biełaruskaj tematyki na rasijskich telekanałach.

«Kali skazać adnym skazam, to pry mantažy pieradačy aŭtary pasprabavali zhładzić usie vostryja vuhły, jakija byli padčas abmierkavańnia», — kaža Kastusioŭ.

Pa jahonych słovach, u pieradačy ŭdzielničaŭ adyjozny rasijski piśmieńnik Uładzimir Jeranasian, jaki pasprabavaŭ vykazacca ŭ duchu, što Biełaruś musić spravazdačycca pierad Rasijaj za kantakty ź Jeŭrasajuzam, bo Rasija daje našaj krainie haz i naftu.

«Druhi niehatyŭny momant z boku Jeranasiana byŭ u tym, što jon pačaŭ krytykavać aŭtaraŭ pieradačy za toje, što jany zaprašajuć u efir pradstaŭnikoŭ apazicyi, jakija prychodziać ź bieł-čyrvona-biełymi značkami, vykazvajuć svaje dumki.

Ja paličyŭ, što heta abraźlivyja vypady nie tolki ŭ adras mianie, ale i ŭsioj Biełarusi. Skazaŭ, što my ŭ Biełarusi možam sami rašyć, ź jakimi značkami chadzić i što kazać. A ŭ Rasii ŭ vielmi mnohich u hałovach jašče nie ŭkładvajecca, što my 25 hadoŭ jak niezaležnaja kraina. Heta ja kažu ciapier spakojna, ale ŭ efiry ŭsio było dosyć harača. Vykinuli maje repliki Jeranasianu, kamunista Atamanava, ekanamista Kavalova, deputata Marzaluka, jany ŭsie jamu adkazvali», — kaža Kastusioŭ.

Jašče adzin momant, jaki nie pakazali pa ANT, kali staršynia BNF paraŭnoŭvaŭ isteryju ŭ rasijskich ŚMI ź situacyjaj 1930-ch u Niamieččynie. «Jak siońnia mnohija ŭ Rasii ličać nas niedakrainaj, hetak i ŭ Niamieččynie tady mnohich ličyli «niedakrainami».

Ryhor Kastusioŭ kaža, što heta nie pieršy raz, kali ŭ pieradačach Dźmitryja Bačkova vyrazajuć toje, što kamuści nie padabajecca. «Vadzim Hihin nikoli nie dazvalaŭ sabie vyrazać słovy ci frazy. U Bačkova ja ŭdzielničaju ŭ druhi raz. Upieršyniu ź mianie vyrazali pałovu, ciapier — dźvie traciny».

Pry hetym Ryhor Kastusioŭ miarkuje, što ŭsio adno varta ŭdzielničać u padobnych šou. «Treba vykarystoŭvać luby momant. Inšaha TB u nas niama».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?