Zaŭtra, 6 śniežnia, na Usierasijskim forumie dobraachvotnikaŭ budzie abvieščanaje rašeńnie ab udziele abo niaŭdziele rasijskich spartoŭcaŭ u zimovaj Alimpijadzie-2018, paviedamlaje Čempijanat. Rašeńnie abvieścić prezident Rasii Uładzimir Pucin.
U prysutnaści 15 tysiač hledačoŭ projdzie šou z udziełam zorak rasijskaj sceny i adbudziecca ŭznaharodžańnie pieramožcaŭ štohadovaj premii «Dobraachvotnik Rasii 2017». Mienavita na hetym mierapryjemstvie prezident Rasii Uładzimir Pucin abvieścić rašeńnie nakont farmatu ŭdziełu rasijskich spartoŭcaŭ u Hulniach-2018 u Pchiončchanie.
Adnačasova kiraŭnik kamiteta Dziarždumy pa fizkultury i sporcie RF Michaił Dziehciaroŭ zajaviŭ u efiry «Pieršaha kanała» ab pravie rasijskich spartoŭcaŭ samavyznačacca.
«Rašeńnie budzie prymać sam schod alimpijcaŭ. Jon projdzie 12 śniežnia. Usie alimpijcy pryjeduć i sami vyrašać. Nie my palityki», — skazaŭ Dziehciaroŭ.
Zhodna z rašeńniem vykankama MAK 5 śniežnia, rasijskija spartsmieny mohuć vystupić na Hulniach u Pchiončchanie tolki pad niejtralnym ściaham. Śpis čystych rasijskich spartoŭcaŭ, jakija zmohuć vystupić na AH-2018 pad niejtralnym ściaham, vyznačyć śpiecyjalnaja kamisija MAK.
