Biełarusy ŭ listapadzie źnizili prodaž najaŭnaj valuty na 10,4% u paraŭnańni z kastryčnikam, da 579,7 młn dalaraŭ. Kupla valuty ścipła vyrasła — na 3,9%, da 93,4 młn dalaraŭ. Pry hetym užo dvaccać dva miesiacy nasielnictva zastajecca čystym pradaŭcom najaŭnaj valuty.
U listapadzie čysty prodaž najaŭnaj valuty źniziŭsia na 47,8%, da 179 młn dalaraŭ paśla źnižeńnia rostu na 19,3% u kastryčniku. Usiaho z pačatku hoda biełarusy zdali ŭžo 2,2 młrd dalaraŭ čystymi najaŭnymi.
Za studzień-listapad 2017 hoda biełarusy kupili najaŭnymi 4,313 młrd dalaraŭ, pradali — 6,636 młrd dalaraŭ. Z ulikam kupli-prodažu bieznajaŭnaj valuty čysty prodaž dasiahnuŭ 1,8 młrd dalaraŭ.
Subjekty haspadarańnia ŭ listapadzie znoŭ byli čystymi pakupnikami valuty. Usiaho za adzinaccać miesiacaŭ pradpryjemstvy pradali 16,469 młrd dalaraŭ, kupili — 17,154 młrd.
Ekśpierty adznačajuć, što častka pradadzienaj hramadzianami valuty — heta nazapašanyja depazity. Pa dadzienych Nacbanka, u minułym hodzie valutnyja depazity fizičnych asob skaracilisia na 9,5%, ci amal na 800 młn dalaraŭ. Za apošniaje dziesiacihodździe heta druhoje i samaje značnaje padzieńnie. Valutnyja depazity biełarusaŭ z 2008 hoda padali tolki ŭ sumna viadomym trochrazovaj devalvacyjaj rubla 2011 hodzie. Tady depazity stracili 3,9%.
Jak adznačajuć ekśpierty, u nasielnictva pry źnižeńni ŭzroŭniu dachodaŭ zachoŭvajecca zvyčka da spažyvańnia, jakoje padaje mienš, čym dachody, heta značyć traciacca źbieražeńni. Pry hetym letam paznačylisia stanoŭčyja tendencyi ŭ śfiery zarabotnaj płaty. U pryvatnaści, siaredni zarobak u kastryčniku vyras, u pieraliku pa siarednieŭzvažanym kursie dalara skłaŭšy 428 dalaraŭ.
