U Hrodnie kiroŭca ź siamirazovym pieravyšeńniem normy ałkaholu ŭ arhaniźmie staŭ vinoŭnikam surjoznaj avaryi, paviedamlaje BIEŁTA sa spasyłkaj na ŭpraŭleńnie DAI UUS Hrodzienskaha abłvykankama. Avaryja adbyłasia ŭviečary 5 śniežnia ŭ ciomny čas sutak.
«Vinoŭnik avaryi, jak akazałasia, ranicaj viarnuŭsia z rejsa, vypiŭ ź siabram litr viski i, paspaŭšy niekalki hadzin, vyrašyŭ jechać da siabie dadomu. Uzrovień ałkaholu ŭ arhaniźmie kiroŭcy pieravysiŭ dapuščalny bolš čym u 7 razoŭ», — paviedamili ŭ DAI rehijonu.
Lehkavik, jaki jechaŭ z vyklučanymi farami, na poŭnaj chutkaści ŭrezaŭsia ŭ aŭtamabil, što stajaŭ na skryžavańni. Udarany «Sieat» pieralacieŭ praź dźvie sustrečnyja pałasy i vylecieŭ na chodnik. Piešachodaŭ i inšych transpartnych srodkaŭ na jaho šlachu, na ščaście, nie akazałasia.
Mašyny paškodžanyja surjozna i, mahčyma, nie padlahajuć adnaŭleńniu. Vinoŭnika avaryi čakaje štraf i pazbaŭleńnie pravoŭ. Da avaryi mužčyna pracavaŭ kiroŭcam aŭtobusa.
