Štočaćvier va ŭsich vajskovych čaściach krainy pravodzicca «adziny dzień infarmavańnia». Padčas jaho łakalnamu kamandavańniu davodziacca ideałahičnyja ŭstanoŭki, jakija vypracoŭvajucca ŭ Hienštabie.
U hety čaćvier, 21 śniežnia, kamandziram pryjšoŭ vielmi rezki i doŭhi list-manałoh ministra abarony Andreja Raŭkova.
U dakumiencie, jaki akazaŭsia ŭ rasparadžeńni «Našaj Nivy», Raŭkoŭ kanstatuje ŭtrymanskija nastroi, prablemy ŭ rabocie z asabovym składam dy inšyja prablemy ŭ vojsku, jakija patrabujuć chutkaha vyrašeńnia.
Pryvodzim vytrymki ź lista Raŭkova.
«Skaračeńnie złačynnaści i śmiarotnaści sałdataŭ u apošnija hady dla častki słužboŭcaŭ stali nahodaj dla samaŭchileńnia ad ruplivaj raboty pa padtrymańni dyscypliny. Jak vynik — bolšaja častka kryminalnych spravaŭ zaviedziena nie kamandzirami, a Śledčym kamitetam, prakuraturaj, u lepšym vypadku Vajskovaj kamiendaturaj. Navidavoku niaviedańnie realnaha stanu rečaŭ», —
adznačaje Raŭkoŭ i kanstatuje, što sioleta zahinuła niekalki sałdataŭ, adzin ź jakich — Koržyč — pry niavyśvietlenych dahetul abstavinach.
«Asobnyja kiraŭniki suciašajuć siabie razmovami, što heta abumoŭlena panižeńniem jakaści pryzyŭnoha kantynhientu, panižeńniem hrašovaha ŭtrymańnia. Takija razmovy źjaŭlajucca naskroź iłžyvymi i falšyvymi i stvarajuć pahrozu dla vykanańnia dziaržaŭnych zadač, zahaniajuć hłybiej sacyjalnuju chvarobu, stvarajuć niedavier da vojska. Sioleta kolkaść asobaŭ z sudzimaściami skłała kala 5%, a z 2009 pa 2012 hod u asobnych pryzyvach kolkaść takich asobaŭ dachodziła da 8%. Adpaviedna, demahrafičnyja prablemy — heta tolki tyja ŭmovy, u jakich znachodziacca Uzbrojenyja siły, pry płanavańni raboty patrebna pryviadzieńnie ŭsiaho ładu vajskovaha žyćcia ŭ adpaviednaść sa Statutam, abo ŭsie inšyja zachady biessensoŭnyja».
Raŭkoŭ kanstatuje, što za apošnija piać hadoŭ tolki 50% udzielnikaŭ złačynstvaŭ [u vojsku] dajšli da suda, a tyja 90% čaściej, dzie niama złačynstvaŭ, nie źjaŭlajucca pakazčykam adsutnaściu parušeńniaŭ i złačynstvaŭ, «bo ŭ bolšaj stupieni jany nosiać łatentny charaktar».
«U adkaznych asobaŭ skłałasia prymityŭnaje razumieńnie sutnaści vychavańnia i absalutnaje nierazumieńnie jaho mietadaŭ», — davodzić Raŭkoŭ i padmacoŭvaje heta ŭzorami.
«31 sakavika skončyŭ žyćcio samahubstvam šarahoviec A. Baściuk. Ź pieršych dzion słužby prajavilisia jahonyja nizkija adaptyŭnyja zdolnaści, nizki ŭzrovień niervovaj ustojlivaści. Usio lažała na pavierchni, sałdat nieadnarazova paviedamlaŭ kamandziram pra ciažkaści słužby. Ale ŭ vyniku abyjakavaści i adsutnaści indyvidualnaj raboty pryčyny prablem sałdata vyjaŭleny nie byli, adpaviedna — nie byli i vyrašany. 11 sakavika da kiraŭnictva pałka źviarnulisia baćki sałdata, jakija paviedamili pra niestatutnyja adnosiny.
Pry hetym sutnaść zvarotu baćkoŭ stała viadomaja kalektyvu, paśla čaho z sałdatam pierastali razmaŭlać sasłužyŭcy. Napiaredadni śmierci sałdat pazvaniŭ maci i raźvitaŭsia ź joj, ale navat paśla hetaha sihnału ad baćkoŭ kantrol za sałdatam i indyvidualnaja rabota ź im nie była arhanizavana.
Heta śviedčyć pra niaviedańnie abstanoŭki ŭ padraździaleńniach, adsutnaść vychavaŭčaj raboty, samaŭchileńnie adkaznych asob ad reahavańnia na prablemy sałdat i nievykanańnie aficerami rekamiendacyj psichołaha pa rabocie ź psichałahična ŭraźlivaj katehoryjaj vajennasłužačych».
Nie abyšoŭ Raŭkoŭ i zdareńnie ŭ Piečach.
«Vyjaŭlenyja najdzičejšyja fakty złačynnaj chałatnaści adkaznych asob, ich samaŭchileńnia ad vykanańnia abaviazkaŭ, najaŭnaść mudrahielistaj sistemy ździekaŭ, vymahańniaŭ hrošaj, pryčym nie tolki ŭ dačynieńni Koržyča. I ŭsio heta ŭ navučalnym centry, dzie, u adroźnieńnie ad vojskaŭ, praściej navieści paradak i arhanizavać adbor małodšych kamandziraŭ.
Pra złačynstvy ŭ 72 AVC daviedalisia tolki ŭ chodzie śledčych dziejańniaŭ. Imia praparščyka Virbała [jaki padazrajecca ŭ vymahańni hrošaj u Koržyčy] stała nazyŭnym, pra jaho viedajuć va ŭsim śviecie. A ŭ 19-aj asobnaj miechanizavanaj bryhadzie vyjaviŭsia taki fakt: u adkaz na zvarot sałdata da kamandzira roty nakont prablem va ŭzajemaadnosinach z sasłužyŭcami, apošni paraiŭ źviarnucca da «asnovy» roty dla vyrašeńnia prablem. Što takoje «asnova»? Heta sinonim «pachana» ci «smatraščaha» na movie kryminalna-łahiernaha žarhona. To bok aficer faktyčna ŭchiliŭsia ad abaviazkaŭ padtrymańnia pravaparadku i pieradaŭ hetyja funkcyi słužačym. Sioleta taksama zaviedziena sprava na pradstaŭnika 72 AVC, jaki jašče ŭ 2012 hodzie pryniaŭ chabar u vyhladzie pakieta praduktaŭ, a potym nieadnarazova prymaŭ dla siabie śpirtnoje, kavu i pradukty ad vajennasłužačych. Kamientary tut zališnija.
Poŭnaja maralnaja dehradacyja. Pry takich aficerach nie moža być paradku».
Dalej pryvodzicca jašče niekalki vypadkaŭ drobnaha chabaru, Raŭkoŭ kanstatuje, što «čym nižejšy pamier kradziažu ci chabaru, tym bolej upaŭ čałaviek», a taksama zapeŭnivaje, što luboje złačynstva ŭ vojsku budzie vyjaŭlena.
Što ž prapanuje ministr?
«Nieabchodna biaźlitasna vyčyščać Uzbrojenyja siły ad asob, dla jakich niama paniaćcia aficerskaha honaru, a taksama źviarnuć uvahu na nastupnaje: adkaznyja asoby, jakija pasprabujuć schavać lubyja pravaparušeńni, a tym bolej złačynstvy, a taksama tyja, chto nie prymie nieabchodnych dziejańniaŭ dla reahavańnia, buduć strohim čynam pryciahvacca da adkaznaści, u tym liku kryminalnaj. Heta aksijoma, bo nastupstvy złačynstvaŭ u vojsku — heta ŭdar pa ŭsioj abaranazdolnaści krainy. Taksama kamandziry buduć usiebakova zaachvočvacca, kali jany svoječasova vyjaviać pravaparušeńnie, u tym liku — zamach na złačynstva ci jaho padrychtoŭku», — reziumuje Raŭkoŭ u svaim liście.
***
Na telehram-kanał «Našaj Nivy» možna padpisacca tut.
