Dekan fiłasofskaha fakulteta BDU, historyk Vadzim Hihin daŭ intervju haziecie «Źviazda», dzie parazvažaŭ nad padziejami stohadovaj daŭniny — Usiebiełaruski źjezd, abviaščeńnie BNR.
Hihin adznačyŭ, što Usiebiełaruskija schody, jakija pravodzić pierad vybarami Łukašenka, źjaŭlajucca praciaham Pieršaha ŭsiebiełaruskaha źjezda, jaki adbyŭsia ŭ śniežni 1917 hoda.
Čamu BNR tak i nie stała «sapraŭdnaj dziaržavaj», spytaŭsia žurnalist u Hihina.
«Nielha było stać dziaržavaj va ŭmovach zamiežnaj akupacyi. Niemcy nie padtrymlivali ideju BNR, choć jaje lidary i raźličvali na ich apieku — heta pieršaje. Druhoje — nie było narodnaj padtrymki.
Tyja ludzi, jakija stvarali BNR, źjaŭlalisia pradstaŭnikami palityčnych sił, jakija prajhrali vybary va Ustanoŭčy schod. Akramia taho, nie było padtrymki z boku astatnich partyj kraju. Jak tolki 25 sakavika 1918 hoda była pryniataja Treciaja ŭstaŭnaja hramata, mienšaviki, esery i inšyja ad BNR adyšli», — skazaŭ Hihin.
Pa jahonych słovach, balšaviki byli hatovyja na stvareńnie Biełaruskaj Savieckaj Sacyjalistyčnaj Respubliki jašče ŭ 1917 hodzie, ale «svavolstvy hrupy Miaśnikova—Knoryna—Łandera, a potym i niamieckaje nastupleńnie zamarudzili hety praces i adkłali jaho až da 1 studzienia 1919 hoda».
Chto na dumku historyka, najbolš paŭpłyvaŭ na stanaŭleńnie biełaruskaj dziaržaŭnaści? «Biełarusy — vielmi mudryja ludzi, bo pa sacyjałahičnych apytańniach siarod najbolš papularnych histaryčnych dziejačaŭ jany vyłučajuć tych, chto nie vyklikaje supiarečnaściaŭ. Heta tyja fihury, jakija nacyju abjadnoŭvajuć, pakolki, jak i ŭ historyi luboj dziaržavy, u nas byli vielmi supiarečlivyja dziejačy.
Dyk voś, najbolš papularnyja histaryčnyja piersanažy ŭ nas — heta Francysk Skaryna, Janka Kupała, Jefrasińnia Połackaja, Kiryła Turaŭski, a śledam zvyčajna idzie Piatro Mašeraŭ», — kaža dekan fiłasofskaha fakulteta BDU.
Paśla hetaha Hihin dadaŭ ad siabie jašče remarku. «Značny ŭkład u toje, što Biełaruś stała asobnaj savieckaj respublikaj, unios Iosif Stalin. I ŭ sklikańni źjezda, i va ŭtvareńni BSSR, potym jaje ŭzbujnieńni, i ŭ dałučeńni Zachodniaj Biełarusi jon adyhraŭ vialikuju rolu. Tak, heta byŭ kryvavy dyktatar i tyran, ale ž bieź jaho ŭjavić raźvićcio biełaruskaj dziaržaŭnaści niemahčyma», — adznačyŭ historyk.
