U Kapylskim rajonie zatrymanaja hrupa maładych ludziej, jakich padazrajuć u sieryi kradziažoŭ karoŭ i cialataŭ ź fierm sielhaspradpryjemstvaŭ rajona. Vykradzienych žyvioł zabivali, a ich miasa i škury zdavali indyvidualnym pradprymalnikam, jakija zajmalisia skupkaj miasa, paviedamlaje UUS Minharvykankama.
U minuły paniadziełak supracoŭniki kryminalnaha vyšuku zatrymali hrupu z dokazami złačynstva niedaloka ad miesca ździajśnieńnia čarhovaha zabojstva skradzienaj karovy.
Pieršaje paviedamleńnie ab kradziažy bydła pastupiła ŭ Kapylski RAUS u kancy červienia. Tady ź fiermy ŭ vioscy Piečurany nieviadomyja vykrali 6 cialataŭ. Niepadalok ad fiermy supracoŭniki milicyi znajšli miesca, dzie złačyncy zabili i razabrali žyvioł. Tam ža byli vyjaŭlenyja i ślady transpartnaha srodku, na jakim pavieźli miasa. Vartaŭnik ničoha patłumačyć nie zmoh. Chutčej za ŭsio za im nazirali, i byŭ abrany čas, kali jon znachodziŭsia ŭ inšaj častcy fiermy.
Apieratyŭniki źviarnuli ŭvahu na narychtoŭščykaŭ miasa. Vyśvietliłasia, što pradprymalniki, jakija zajmajucca hetym biznesam, sami nie zabivajuć žyvioł. Z hetaj metaj nieadnojčy pryciahvałasia kampanija maładych ludziej, 21-23 hadoŭ, žycharoŭ viosak Maža i Čyrvony Partyzan Kapylskaha rajona.
U chłopcaŭ byŭ mikraaŭtobus i ŭsie nieabchodnyja dla takich spraŭ «instrumienty». Za peŭny hanarar kampanija achvotna zhadžałasia źjeździć u lubuju kropku rajona, pieradać hrošy pradaŭcu, na miescy razabrać žyviołu i pryvieźci miasa zakazčyku.
Pry hetym usie pradprymalniki zapeŭnivali, što sami davali maładym ludziam adrasy viaskoŭcaŭ, jakija žadali zdać im žyviołu, to bok usio pryviezienaje imi miasa było «čystaje» — možna było lohka pravieryć, adkul jano pastupała.
Adnak za pierasoŭvańniami hrupy pa rajonie nazirali niekalki mabilnych hrup milicyi, tym bolš, što ŭsie maładyja ludzi ŭžo mieli sudzimaści za kradziažy ci chulihanstva, nidzie nie pracavali, a hrošaj ad zakazaŭ pradprymalnikaŭ naŭrad ci chapała na toj ład žyćcia, jaki jany viali.
U minuły paniadziełak kala dvuch hadzin nočy pablizu vioski Skabin Kapylskaha rajona supracoŭnikami kryminalnaha vyšuku UUS Minskaha abłvykankama, Kapylskaha RAUS i Departamienta achovy byŭ spynieny mikraaŭtobus, u jakim znachodzilisia troje ŭžo znajomych apieratyŭnikam maładych ludziej i tuša karovy.
Nieŭzabavie apieratyŭniki znajšli miesca, dzie była zabitaja i razabranaja žyvioła, a taksama i fierma, ź jakoj jana była vykradzienaja.
Pieravozčyki miasa zatrymanyja i pryznalisia ŭ ździajśnieńni piaci kradziažoŭ žyvioły. Raspačatyja kryminalnyja spravy pa častcy 2 artykuła 205 Kryminalnaha kodeksa Respubliki Biełaruś (kradziež, učynieny hrupaj asob), sankcyja jakoj praduhledžvaje da 4 hadoŭ pazbaŭleńnia voli.
