Pamierła narodnaja artystka Biełarusi, charavy dyryžor Ludmiła Barysaŭna Jafimava, paviedamili karespandentu BiełTA ŭ Biełdziaržfiłarmonii. Raźvitańnie adbudziecca ŭ Biełdziaržfiłarmonii ŭ piatnicu, 5 studzienia.

U sakaviku 2017 hoda narodnaja artystka Biełarusi adznačyła 80-hodździe. Ludmiłu Barysaŭnu Jafimavu kalehi nazyvali «hienijem charavoj muzyki», «dyryžoram, jaki kiruje choram jak muzyčnym instrumientam».

Ludmiła Barysaŭna naradziłasia va ŭkrainskim horadzie Horłaŭka ŭ 1937 hodzie. Jaje junactva prajšło ŭ Leninhradzie, dzie jana jašče studentkaj kansiervatoryi paznajomiłasia sa svaim budučym mužam — dyryžoram, narodnym artystam Biełarusi Juryjem Jafimavym. Paśla zakančeńnia kansiervatoryi ŭ 1963 hodzie Ludmile prapanavali ŭznačalić leninhradskuju kapełu, adnak małady chormajstar admoviłasia: nie zachacieła iści prakładzienym šlacham.

Uśled za mužam jana pierabrałasia ŭ Minsk, dzie pieršy čas pracavała na radyjo, a zatym uładkavałasia redaktaram telebačańnia. Z 1967 hoda Ludmiła Jafimava 20 hadoŭ vykładała ŭ Minskim muzyčnym vučyliščy imia Michaiła Hlinki, dzie zasnavali kancertny chor. Kalektyŭ dasiahnuŭ amal prafiesijnaha ŭzroŭniu, kali kiraŭnika zaprasili ŭznačalić Dziaržaŭnuju akademičnuju charavuju kapełu Respubliki Biełaruś imia Ryhora Šyrmy.

Z 1987 hoda Ludmiła Jafimava źjaŭlałasia jaje niaźmiennym chormajstram. Za hety čas kapeła zdabyła mienavita toje majsterstva, jakoje dazvalaje joj być u liku najlepšych choraŭ Jeŭropy. Ludmiła Jafimava ŭdychnuła novaje žyćcio ŭ najstarejšy kalektyŭ Biełarusi, pašyryŭšy jaho repiertuar, u jakim siońnia kaštoŭnaści narodnaj muzyki, tvory sučasnaj i šedeŭry suśvietnaj kłasiki. Za ŭniosak u raźvićcio i prapahandu ajčynnaha charavoha mastactva i biełaruskaj narodnaj muzyki Ludmile Barysaŭnie byli prysvojeny hanarovyja zvańni zasłužanaha dziejača mastactvaŭ Biełarusi i narodnaha artysta Biełarusi, u 2010 hodzie jana była ŭznaharodžana ordenam Francyska Skaryny.

Клас
Панылы сорам
Ха-ха
Ого
Сумна
Абуральна