Palitołah Andrej Suzdalcaŭ, vysłany ŭ 2006 hodzie ź Biełarusi z farmuloŭkaj «staviŭ pad pahrozu nacyjanalnuju biaśpieku», na svaim sajcie «Političieskoje obozrienije» z rasijskich pazicyj praanalizavaŭ aktualny stan biełaruska-rasijskich adnosin.

Jon śćviardžaje, što biełaruskija ŭłady imknucca ŭsimi sprobami zachavać nizkuju canu na rasijskija naftu i haz, a taksama abvinavačvaje Biełaruś u tym, što jana stvaryła nielehalnyja tranzitnyja patoki zamiežnych hramadzian praz adkrytuju biełaruska-rasijskuju hranicu. Na dumku Suzdalcava, mienavita heta prymušaje Rasiju stvaryć paŭnavartasnuju miažu ź Biełaruśsiu.

Rasijski palitołah nahadvaje, što da kanca 2017 hoda tak i nie było vyrašana pytańnie transpartavańnia biełaruskich naftapraduktaŭ praz rasijskija party. Maskva nastojvaje na tym, što pradukcyja biełaruskich naftapierapracoŭčych zavodaŭ musić ekspartavacca praz Rasiju, a nie party Vientśpiłsa i Kłajpiedy. Suzdalcaŭ ličyć, što prablema nie maje rašeńnia, pakolki aficyjny Minsk absalutna nie zacikaŭleny ŭ pieraraźmierkavańni pastavak.

Palitołah nahadaŭ, što ŭ Rasii idzie ŭkaranieńnie «padatkovaha manieŭru», i ŭ pierśpiektyvie nafta ŭ Biełaruś budzie pastaŭlacca pa suśvietnych cenach. A tak zvany «naftavy afšor», jaki ciapier isnuje ŭ Biełarusi, spynić svajo isnavańnie.

Andrej Suzdalcaŭ pryznaje, što pytańnie cany na enierharesursy dla Biełarusi całkam zaležyć ad jaje palityčnaj łajalnaści.

«U Rasii pastupova ŭkaraniajecca ŭ cełym krytyčnaje staŭleńnie da sučasnaj Biełarusi jak krainy, što nie moža pretendavać na status sajuźnika Rasii. Niama sumnievaŭ, što mahčymaści Minska «prasunuć» na pieramovach u Maskvie patrebny biełaruskamu kiraŭnictvu farmat hazavych adnosin z «Hazpromam» rezka skaracilisia paśla hałasavańnia biełaruskaj parłamienckaj delehacyjaj za antyrasijskuju Minskuju dekłaracyju letaś 9 lipienia».

Andrej Suzdalcaŭ

Andrej Suzdalcaŭ

Rasijski palitołah taksama zaŭvažyŭ, što ŭ 2017 hodzie Biełaruś atrymlivała haz pa canie $143,6, a pradpryjemstvam haz pradavaŭsia ŭžo pa $270 za tysiaču kubamietraŭ. Takim čynam, biełaruskaja nacenka na rasijski haz skłała 88%, u toj čas jak Rasija pastaŭlaje svaim pradpryjemstvam haz z maksimalnaj nacenkaj 17%.

Suzdalcaŭ śćviardžaje, što takim čynam «biełaruskija aliharchi» za 2017 hod zarabili ad 2,5 da 2,7 miljarda dalaraŭ.

Vialikuju ŭvahu Suzdalcaŭ źviarnuŭ i na pytańnie biełaruska-rasijskaj miažy. Na jaho dumku, Biełaruś zarablaje vialikija hrošy, karystajučysia svaim statusam «pamiežnaha afšora». Palitołah ščyra pierakanany, što z kanca 1990-ych žychary Polščy i krain Bałtyi pačali aktyŭna karystacca biełaruskim «aknom» na biełaruska-rasijskaj miažy, a z 2014 hoda praź Biełaruś u Rasiju nibyta pačali traplać ahienty SBU, vieterany ATA i prychilniki «Pravaha siektara».

Piacidzionny biaźvizavy režym dla hramadzian 80 krain praź minski aeraport u Rasii ŭspryniali jašče bolš baluča.

Suzdalcaŭ upeŭnieny, što Biełaruś pajšła na taki krok tolki dla taho, kab stać tranzitnym punktam dla tych, chto choča źjeździć u Rasiju.

«Zrazumieła, što biez Rasii Minsk i sama Biełaruś nijakaj realnaj cikavaści, na žal, dla turystaŭ nie ŭjaŭlaje», — piša Suzdalcaŭ.

Palitołah ličyć, što paŭnavartasnyja pasty mohuć źjavicca na biełaruska-rasijskaj miažy ŭžo ŭ krasaviku 2018 hoda.

«Biełaruski afšor zakryjecca, a razam ź im i čarhovaja karmuška biełaruskaha režymu za košt Rasii».

Zakančvaje Suzdalcaŭ pravakacyjnym pytańniem.

«Mižvoli ŭźnikaje ceły šerah pytańniaŭ: na kaho pracuje Minsk, čyje intaresy adstojvaje, ad kaho ŭziaŭ avans na čarhovuju «ściežku Łukašenki» ŭ Rasiju, kaho supakojvaje i abnadziejvaje? Ukrainu, Paŭnočnuju Afryku, raźbituju Isłamskuju dziaržavu?»

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?