Hanna Pachołka (Śmilevič) upeŭnienaja, što jaje adličvajuć za palityku. Vykładčyca Taćciana Padalak (źleva) zapeŭniła «Našu Nivu», što pytańnie vyklučna ŭ viedach.
Druhakurśnica Instytuta žurnalistyki BDU Hanna Śmilevič, jakaja niadaŭna ŭznačaliła «Moładź BNF», paviedamiła hramadskaści, što jaje zavalvajuć na ispytach. Dziaŭčyna nie zdała try ispyty i, chutčej za ŭsio, budzie adličana. Jana ŭpeŭnienaja, što heta źviazana ź jaje palityčnaj dziejnaściu.
«Studentki Śmilevič u nas niama» — adkazali ŭ Instytucie žurnalistyki. Vyjaviłasia, što nasamreč dziaŭčynu zavuć Hanna Pachołka. A Śmilevič — heta proźvišča baćki i, pa słovach Hanny, jaje «palityčny psieŭdanim».
Vykładčyca Taćciana Padalak zapeŭniła «Našu Nivu», što pastaviła Hańnie kiepskuju adznaku vyklučna praz kiepskija viedy studentki.
Mienavita Padalak prymała ŭ jaje apošni, treci ispyt pa prafiesijnaj etycy žurnalista.
«Chaj hetaja dziaŭčyna mnie patelefanuje. Usie ekzamieny ja zapisvaju na dyktafon. Nie mahu pradstavić vam zapis, bo nie papiaredžvaju studentaŭ pra dyktafon — heta dla mianie, na ŭsiaki vypadak, — tłumačyć Taćciana Padalak. — Na vialiki žal, studentka była nie tolki nie padrychtavanaja, a jašče i nie viedała elemientarnych rečaŭ. Jakich — ja nie mahu skazać. Vy ŭ jaje spytajcie, a ŭ mianie ŭsio zapisana».
Hanna Pachołka była absalutna niepadrychtavanaja da ekzamiena, zapeŭniła Padalak.
«Dla mianie było dziva dziŭnaje: ja jašče nie pryjšła z ekzamiena, jak mnie studenty kažuć, što jana ŭžo na sajtach daje kamientar, što jaje adličyli!» — uzhadała vykładčyca.
«Chaj Hanna sa mnoj źviažacca i patłumačyć, što heta takoje, — paprasiła Taćciana Padalak. — Darečy, ja była vielmi ździŭlenaja i vymušanaja była spytać, jak jana pastupiła na fakultet žurnalistyki z takimi viedami.
Ja spytała ŭ jaje, a ź jakoha času viaduć adlik biełaruskaja i suśvietnaja žurnalistyka? Jana mnie adkazała, što žurnalistyka była zaŭsiody. Heta pryhoža, ale ž niedakładna. Ja ŭdakładniała niekatoryja rečy pra «Našu Nivu», jana nie adkazała na elemientarnyja pytańni.
Uvohule, u mianie skłałasia ŭražańnie, što ci to jana nie viedaje elemientarnych rečaŭ, ci to naŭmysna maŭčyć, kab atrymać niezadavalniajučuju adznaku», — kaža Padalak.
Padalak śćviardžaje, što na ekzamienie pastaviła piać «dvojek».
Varta adznačyć, što ekzamien byŭ pa prafiesijnaj etycy, a pytańni, pracytavanyja Padalak, byli skiravanyja na pravierku ahulnych viedaŭ.
Hanna Śmilevič (Pachołka) nastojvaje: adnahrupniki, jakija adkazvali pierad joj, adkazvali nie lepš za jaje, ale atrymali stanoŭčuju adznaku.
Hanna Śmilevič (Pachołka) vučyłasia na biudžetnym adździaleńni. Siaredni bał atestata składaŭ 9,2 bała, na centralizavanym teściravańni pa ruskaj movie jana nabrała 96 bałaŭ.
Na zimovaj siesii jana nie zmahła zdać adrazu «Movu i styl srodkaŭ masavaj kamunikacyi», «Teoryju žurnalistyki» i «Prafiesijnuju etyku».
Jašče adna vykładčyca BDU tłumačyć pravalenyja ekzamieny staršyni «Moładzi BNF»: Hanna napisała «sovpOdajet» i «paraLelno»
Studentku, jakaja ŭznačaliła «Moładź BNF», adličvajuć z BDU
