Kiraŭnik krainy vyzvaliŭ Mikałaja Korbuta z pasady pamočnika prezidenta pa ahulnych pytańniach, a taksama ŭzhadniŭ jaho na pasadu namieśnika dziaržsaktara «sajuznaj dziaržavy». Raniej hetuju pasadu ad Biełarusi zajmaŭ Ivan Bambiza, jaki ad 2004 da 2010 byŭ vice-premjeram. Apošnija hady Korbut byŭ tym čałaviekam, jaki byŭ nabližany da Łukašenki jak nichto inšy z čynoŭnikaŭ.

Absłuhoŭvaŭ dypłamataŭ

Naradziŭsia Mikałaj Korbut u 1963 hodzie ŭ vioscy Uža Kapylskaha rajona, heta niedaloka ad miastečka Hrozava, dzie prachodzili bajavyja dziejańni padčas Słuckaha paŭstańnia 1920 hoda.

Korbut vyšejšuju adukacyju atrymaŭ u narhasie. Hety čałaviek pravierany. 18 hadoŭ jon adpracavaŭ u Kiraŭnictvie spravaŭ prezidenta. Spačatku ŭznačalvaŭ «Dypsiervis» — arhanizacyju, jakaja zajmajecca absłuhoŭvańniem dypłamatyčnaha korpusa i aficyjnych delehacyj. Akramia taho, u abaviazki ŭstanovy taksama ŭvachodzić materyjalna-techničnaje i sacyjalna-bytavoje zabieśpiačeńnie dziejnaści vyšejšych słužbovych asobaŭ. U 2001 jon staŭ pieršym namieśnikam kiraŭnika spravami. A ŭ 2009 sam uznačaliŭ hetaje viedamstva.

«Dla vas važnaja sumlennaść i prystojnaść u pracy. Vas abaviazvaje da hetaha sama šylda vašaha viedamstva — Kiraŭnictva spravaŭ prezidenta. Kali ŭ vas niejki pralik — adrazu kidajecca cień na prezidenta», — kazaŭ Łukašenka, pryznačajučy Korbuta.

Zahadčyk vializnaj biznes-impieryi

Kiraŭnikoŭ spravaŭ prezidenta inakš nazyvajuć prezidenckimi «zaŭhaspami». Na hetaj pasadzie za časy kiravańnia Łukašenki byli roznyja ludzi. Naprykład, pieršym byŭ Ivan Ciciankoŭ. Toj samy, jaki rvaŭ bieł-čyrvona-bieły ściah paśla refierendumu ab źmienie simvoliki, a paśla ŭciok u Rasiju. Ad 2001 da 2004 upraŭlajučaj była Halina Žuraŭkova, jakuju aryštavali za raskradańni, ale kiraŭnik dziaržavy jaje pamiłavaŭ. Ciapier uznačalvaje viedamstva Viktar Šejman.

Kiraŭnictva spravami prezidenta — heta vializnaja biznes-impieryja, jakaja ŭklučaje ŭ siabie łatarei, ofisy, kaviarni, navat nacyjanalnyja parki, sanatoryi (jak u Biełarusi, tak i za miažoj), hateli. Tamu i pasada ŭpraŭlajučaha vielmi adkaznaja.

Publičnuju niezadavolenaść pracaj Kiraŭnictva spravami prezidenta Łukašenka vykazvaŭ adnojčy. Kali stali viadomyja fakty isnavańnia bardela ŭ Nacyjanalnym parku «Prypiacki», a taksama złoŭžyvańni padčas palavańniaŭ tam ža. Korbutu zahadali «žastačajša» z hetym razabracca.

Pahroza kryminalnaj spravy

Sychodziŭ z pasady kiraŭnika spravami prezidenta Mikałaj Korbut sa skandałam. Niekatoryja ŚMI paviedamlali, što čynoŭnik źmieščany pad chatni aryšt. Nibyta Korbuta abvinavačvali ŭ masavych parušeńniach padčas budaŭnictva biełaruskich abjektaŭ u Sočy. Prachodziła navat infarmacyja, što namieśnik Korbuta Anatol Dazoraŭ sprabavaŭ uskryć sabie vieny prosta ŭ pracoŭnym kabiniecie.

«Naša Niva» dazvaniłasia da Korbuta ŭ tyja dni, ale jon rašuča admoviŭsia kamientavać čutki pra kryminalnuju spravu suprać jaho.

Pra toje, što dymu biez ahniu nie byvaje, uskosna śviedčyć toj fakt, što ŭ vyniku za kratami akazalisia tolki rasijskija biznesoŭcy, jakija zajmalisia budaŭnictvam biełaruskich abjektaŭ u Sočy, jak Hieorhij Sarakašyš. Sam Korbut paźbieh kryminalnaj adkaznaści, a praź niejki čas byŭ pryznačany pamočnikam Łukašenki pa Minskaj vobłaści.

Asabliva nabližany da Łukašenki

Pra toje, što Korbut apošnim časam staŭ asabliva nabližanym da Alaksandra Łukašenki, śviedčyć fakt, što heta adziny čynoŭnik, jaki źjaŭlajecca ŭ kadrach padčas niefarmalnych mierapryjemstvaŭ z udziełam kiraŭnika krainy. Mienavita Korbut byŭ adnym z tych, chto vučyŭ kasić siena znakamitaha francuzskaha akciora Žerara Depardjo, razam z Łukašenkam Korbut źbiraŭ u Drazdach bulbu i kavuny. Tam byli biznesoŭcy, spartoŭcy, ale bolej nivodnaha čynoŭnika. Prysutničaŭ jon i padčas viačery Alaksandra Łukašenki z akcioram Styvienam Sihałam.

Korbut maje svoj dom u Drazdach — samym prestyžnym rajonie biełaruskaj stalicy.

Pamočnik pa ahulnych pytańniach

Apošni hod ź nievialikim Korbut zajmaŭ pasadu pamočnika prezidenta pa ahulnych pytańniach. Faktyčna jahonyja funkcyi mała ŭ čym źmianilisia. Naprykład, Korbut supravadžaŭ Łukašenku i jahonych synoŭ Viktara i Mikałaja padčas letašniaha adpačynku ŭ AAE. Padčas subotnika ŭ krasaviku 2017 hoda Łukašenka źviartaŭsia da byłoj himnastki Ksienii Sankovič, ci zhodnaja jana, kab Centr alimpijskaj padrychtoŭski adkryli da 8 sakavika nastupnaha hoda, taja zhadziłasia. «Korbut, Sankovič na kantrol», — adreahavaŭ kiraŭnik dziaržavy.

U apošnim rejtynhu «NN» samych upłyvovych ludziej krainy Mikałaj Korbut zajmaŭ 40-je miesca.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?