Za minuły hod biełaruskija aŭtamabilisty zapłacili bolš za 9 miljonaŭ rubloŭ, abo 4,5 miljona dalaraŭ štrafaŭ pavodle «listoŭ ščaścia». Takija dadzienyja ahučyli ŭ Ministerstvie finansaŭ, paviedamlaje TUT.by.

Minimalny štraf za pieravyšeńnie chutkaści, zafiksavanaje kamieraj, roŭny 12,25 rubla (0,5 bazavaj vieličyni). Pa dadzienych na 5 studzienia hetaha hoda, na biełaruskich darohach ŭstanoŭlena 364 stacyjanarnyja kamiery fiksacyi chutkaści.

- Z ulikam taho, što hetyja štrafy nie majuć metavaha nakiravańnia, jany nakiroŭvajucca na finansavańnie ahulnych raschodaŭ biudžetu, - adznačyli ŭ Minfinie.

Raniej DAI MUS zajaŭlała, što za hod biełarusy ŭ siarednim atrymlivajuć kala miljona «listoŭ ščaścia». Pry hetym kala 85-90% štrafaŭ pa Minsku na siońniašni momant spahaniajucca.

- Kali hetaja sistema ŭkaraniałasia, byli aściarohi, što efiektyŭnaść miery budzie vielmi nizkaj. Ale ja pavinien skazać, što našy hramadzianie surjozna padychodziać da vypłaty štrafaŭ. Heta značyć parušajuć, ale hatovyja za heta nieści adkaznaść. U 10-15% vypadkaŭ štrafy spahaniajuć u prymusovym paradku. Kali niejkim čynam vy nie atrymali paviedamleńnie pra štraf (drenna pracuje pošta, vy nie žyviacie pa miescy prapiski) i ŭ kursie, što parušyli, lepš lišni raz zapytacca na sajcie ab najaŭnaści pravaparušeńnia abo jaho adsutnaści, — skazaŭ načalnik adździeła zabieśpiačeńnia pravaprymianialnaj dziejnaści UDAI MUS Alaksandr Zanimon.

Клас
0
Панылы сорам
0
Ха-ха
0
Ого
0
Сумна
0
Абуральна
0