Vierchniaja pałata polskaha parłamienta ŭchvaliła zakon ab kryminalnaj adkaznaści za vykazvańni pra nacysckija łahiery śmierci jak pra «polskija» i za admaŭleńnie złačynstvaŭ «banderyzmu», paviedamlaje Radyjo Svaboda.

U noč na čaćvier, 1 lutaha, u polskim Sienacie adbyłosia hałasavańnie za źmieny ŭ zakon ab Instytucie nacyjanalnaj pamiaci, jakimi ŭvodzicca kryminalnaja adkaznaść za admaŭleńnie złačynstvaŭ «ukrainskich nacyjanalistaŭ», a taksama za prypisvańnie polskamu narodu nacysckich złačynstvaŭ.

57 z 82 prysutnych u Sienacie deputataŭ prahałasavali za ŭniasieńnie źmienaŭ u adpaviedny zakon. 23 deputaty-apazicyjaniery vykazalisia suprać, adzin ustrymaŭsia. Kab zakon ustupiŭ u siłu, jaho jašče pavinien padpisać prezident Polščy Andžej Duda.

26 studzienia Siejm Polščy, nižniaja pałata parłamientu, unios źmieny ŭ zakon ab Instytucie nacyjanalnaj pamiaci, jaki zabaraniaje prapahandu tatalitarnych ideałohij i vyznačaje złačynnym udzieł «banderaŭskich nacyjanalistaŭ» u źniščeńni habrejskaha nasielnictva i hienacydzie hramadzian mižvajennaj Polščy na terytoryi Vałyni i Haliččyny. Pavodle źmienaŭ, parušalnikaŭ abnoŭlenaha zakonu buduć karać hrašovymi štrafami abo źniavoleńniem da troch hadoŭ.

Ministerstva zamiežnych spravaŭ Ukrainy ŭ svajoj zajavie nazyvała rašeńnie polskaha Siejma «čarhovaj sprobaj naviazać adnabakovuju traktoŭku histaryčnych padziej».

Akramia taho, zhadanym zakonaprajektam praduhledžany kryminalny pieraśled tych, chto prypisvaje palakam złačynstvy nacystaŭ, u pryvatnaści ŭžyvaje słovazłučeńnie «polskija łahiery śmierci». Hetaja častka źmienaŭ u zakon aburyła Izrail. Premjer-ministr Izraila Bińjamin Netańjahu nazvaŭ zakon «nieabhruntavanym», a Suśvietny centr pamiaci achviar Chałakostu zajaviŭ, što polskija zakanadaŭčyja źmieny mohuć «pryvieści da razmyvańnia histaryčnaj praŭdy ab dapamozie, jakuju niemcy atrymali ad polskaha nasielnictva padčas Chałakostu».

U Izraili ŭ adkaz uchvalili svoj zakonaprajekt, jaki padtrymała bolšaść deputataŭ izrailskaha parłamientu i jaki faktyčna zrobić niezakonnaj formaj admaŭleńnia Chałakostu polski zakonaprajekt.

Meta hetych papravak — nie dazvolić źmianšać adkaznaść tych, chto dapamahaŭ nacystam. Akramia taho, źmienieny zakon harantuje jurydyčnuju dapamohu tym, chto pieražyŭ Chałakost i tym, chto zajmajecca adukacyjaj pra łahiery śmierci, kali suprać ich za miažoj padaduć sudovyja pazovy za ŭspaminy z časoŭ Chałakostu.

Pavodle zakona, pryniataha ŭ Izraili ŭ 1986 hodzie, kožny, chto admaŭlaje Chałakost ci padtrymlivaje złačynstvy suprać habrejskaha narodu, moža atrymać da piaci hadoŭ turemnaha źniavoleńnia.

Клас
0
Панылы сорам
0
Ха-ха
0
Ого
0
Сумна
0
Абуральна
0