Pa vynikach razhladu apielacyj hrupy rasijanaŭ Spartyŭny arbitraž u Łazanie (CAS) vyrašyŭ całkam źniać sankcyi z 28 atletaŭ, jašče ŭ dačynieńni da 11 čałaviek pakarańni źmiakčyli. Słuchańni jašče pa troch spravach adkładzienyja.
Reuters.com
U dačynieńni da ŭsich 28 rasijanaŭ, całkam apraŭdanych CAS, anulavana rašeńnie ab pažyćciovym adchileńni ad udziełu ŭ Alimpijskich hulniach za parušeńnie antydopinhavych praviłaŭ na Alimpijadzie ŭ Sočy, jakoje vynies Mižnarodny alimpijski kamitet (MAK) pa vynikach rasśledavańnia kamisii Denisa Osvalda. Jana zajmałasia pierapravierki dopinh-probaŭ rasijan z Hulniaŭ u Sočy.
CAS taksama adnaviŭ vyniki apraŭdanych spartsmienaŭ, jakija jany pakazali na Alimpijadzie ŭ Sočy. U dačynieńni da jašče 11 spartsmienaŭ pryniata rašeńnie ab ich častkovaj reabilitacyi, jany zmohuć udzielničać u Alimpijadach, ale pavinny buduć prapuścić Hulni ŭ Pchiončchanie.
Siarod całkam apraŭdanych: babśleisty Dźmitryj Truniankoŭ, Alaksiej Niehadajła, skieletanisty Alaksandr Traćciakoŭ, Siarhiej Čudzinaŭ, łyžniki Alaksandr Lahkoŭ, Jaŭhien Białoŭ, Maksim Vylahžanin, Alaksiej Pietuchoŭ.
Adkładzienyja słuchańni pa spravach bijatłanistak Volhi Zajcavaj, Volhi Viłuchinaj i Jany Ramanavaj.
Rašeńnie CAS nie aznačaje aŭtamatyčnaha trapleńnia adnoŭlenych u pravach spartsmienaŭ na Alimpijadu, padkreśliŭ u hutarcy z RBK kiraŭnik kamisii Asacyjacyi jurystaŭ Rasii pa spartyŭnym pravie Siarhiej Alaksiejeŭ.
«Pamiž rašeńniem suda i zaprašeńniem na Alimpijadu niama pramoj suviazi. Heta zastajecca na rašeńnie kamisii MAK», — rastłumačyŭ jon.
