Udakładniena: Daloka nie 600 tysiač ton, i nie zamiest masła: vypraŭlajem pamyłki pra palmavy alej

U 2018 hodzie Minski marharynavy zavod zakupić 600 tysiač ton palmavaha aleju. Na palmavy alej i jaho anałahi naŭzamien masłu pierachodzić taksama kandytarskaja pramysłovaść Biełarusi.

U navukoŭcaŭ heta vyklikaje vialikuju tryvohu. Pryčyna cikavaści charčavikoŭ da palmavaha aleju,paviedamlaje «Biełaruski partyzan», u rašeńni JEAES, u adpaviednaści ź jakim z 1 studzienia 2018 hoda stali bolš žorstkimi patrabavańni da składu trans-izamieraŭ tłustych kisłot u praduktach (inšymi słovami — masła). U praduktach ich ciapier pavinna źmiaščacca nie bolš za 2% ad usiaho tłušču ŭ pradukcie. Adpaviednaje patrabavańnie, ustanoŭlenaje techničnym rehłamientam Mytnaha sajuza na alejna-tłuščavuju pradukcyju.

Rašeńnie padavałasia jak revalucyjnaje. Navukovyja daśledavańni apošnich hadoŭ dakazali, što trans-izamiery tłustych kisłot źjaŭlajucca pryčynaj raźvićcia mnohich zachvorvańniaŭ, samyja niebiaśpiečnyja ź jakich — išemičnaja chvaroba, ateraskleroz, cukroŭka druhoha typu, atłuścieńnie i h.d.

Ci nastolki vyvučany palmavy alej, kab zamianiać im zvykłaje masła? Čamu na Zachadzie pradukty navat majuć śpiecyjalnyja paznaki — «Biez palmavaha aleju»? Miarkujučy pa pieršych źviestkach, pa ŭździejańni na arhanizm čałavieka jon padobny da žyviolnych tłuščoŭ. Adnak palmavy alej značna tańniejšy za masła.

Jak raspaviała haziecie «Navuka» pradstaŭnik «Biełdziaržcharčprama» Inesa Dembickaja, taja ž «Kamunarka» doŭhi čas sprabavała zachavać u receptury cukierak vykarystańnie naturalnych tłuščaŭ. Ale «Kamunarka» nie vytrymała cenavuju kankurencyju z rasijskimi i ŭkrainskimi vytvorcami. U vyniku, pa słovach, Inesy Dembickaj, u «Kamunarki» zachavałasia tolki šeść vidaŭ cukierak, u jakich vykarystoŭvajecca jašče savieckaja receptura.

Biełaruskija navukoŭcy spasyłajucca na dośvied raźvitych krain, dzie pradukty z palmavym alejem masava kanfiskoŭvajucca z prodažu. Tamu što zamiest trans-izamieraŭ my zaraz z praduktami budziem atrymlivać kancerahieny, jakija ŭ vialikaj kancentracyi źjaŭlajucca absalutnaj atrutaj i vyklikajuć niebiaśpiečnyja zachvorvańni.

Biełaruskija navukoŭcy ciapier sprabujuć damahčysia chacia b zabarony na vykarystańnie palmavaha aleju ŭ praduktach dla dziciačaha charčavańnia, a taksama charčavańnia dla daškolnikaŭ i školnikaŭ. Akramia taho, jany ličać nieabchodnym abaviazać vytvorcaŭ pakazvać na markiroŭcy, jaki typ masła ŭžyvajecca — a to my pahłynajem palmavy alej tonami, navat ni pra što nie padazrajučy.

Pa vynikach apošniaha pasiadžeńnia Mižviedamasnaj rady pa charčavańni adpaviednyja prapanovy nakiravany ŭ Saŭmin. Adnak heta ŭžo nie takaja prostaja pracedura — źmieny treba ŭnosić nie ŭ biełaruski zakon, a ŭ techrehłamient JEAES.

Varta adznačyć, što Biełaruś vyrablaje masła ź liškam, navat ekspartuje jaho. Tady jak Rasija svaje patreby ŭ maśle nie pakryvaje, tamu i vymušanaja zavozić u tym liku palmavy alej.

Клас
0
Панылы сорам
0
Ха-ха
0
Ого
0
Сумна
0
Абуральна
0