U tradycyjnym šeści nacyjanalistaŭ u Vilni, jakoje prajšło 11 sakavika pad łozunham «Litva dla litoŭcaŭ», udzielničali biełaruskija palityki Mikoła Statkievič i Uładzimir Niaklajeŭ, piša Radyjo Svaboda.
Niaklajeŭ navat vystupiŭ na ich mitynhu na Łukišskaj płoščy — pračytaŭ frahmient sa svajoj paemy «Pałanez», dzie refrenam hučała słova «Litva».
Delfi.lt
U šeści, jakoje pačałosia ad płoščy Hiedymina i zaviaršyłasia mitynham na Łukiskaj płoščy, uziali ŭdzieł bolš za 1 tysiaču čałaviek. Vystupali na mitynhu pradstaŭniki ŭkrainskich partyj «Svaboda», «Pravy sektar», «Nacyjanalny korpus». Siarod vystupoŭcaŭ byŭ i Majk Miuler — rehijanalny lider moładzievaha kryła ultrapravaj Nacyjanał-demakratyčnaj partyi Niamieččyny, jakuju časam nazyvajuć pravaekstremisckaj i neanacysckaj.
Niaklajeŭ: «Ja nia ŭviazvaŭsia ŭ palityčnyja sprečki, a adkazaŭ vieršam»
Uładzimier Niaklajeŭ u kamentary Svabodzie zaŭvažyŭ, što jany sa Statkievičam udzielničali nia tolki ŭ Maršy nacyjanalistaŭ, a i ŭ aficyjnych imprezach, arhanizavanych uradam 11 sakavika. Paet kaža, što hety marš arhanizavaŭ «Sajudzis». Pratestavali na im i suprać budaŭnictva Biełaruskaj AES u Astraŭcy, niepadalok ad terytoryi Litvy.
«Kali stała zrazumieła, što intanacyja mitynhu «skočvajecca» ŭ taki krajni nacyjanalizm — «Litva dla litoŭcaŭ», a my staim na miescy, dzie paviesili Kastusia Kalinoŭskaha, i Vilnia — stalica nia tolki dla litoŭcaŭ, ale darahi horad dla nas, biełarusaŭ, ja vyjšaŭ da mikrafona, nahadaŭ pra našu historyju, pra adnosiny Biełarusi ź Litvoj i Polščaj.
Ja vyrašyŭ nia ŭviazvacca ŭ palityčnyja sprečki, a adkazać metafaraj. Ja pračytaŭ uryvak z paemy «Palanez». Prysutnyja reahavali davoli śmiešna. Tam niekalki razoŭ paŭtarajecca słova «Litva». Kali ja pramaŭlaŭ «Litva», ludzi plaskali, a ja ž čytaŭ pra Biełaruś, pra našu historyju, pra našu dziaržavu! Heta była adna ź lepšych maich metafaryčnych prydumak», — pierakanany Ŭładzimier Niaklajeŭ.
Pradstaŭlajučy biełaruskich palitykaŭ Uładzimiera Niaklajeva i Mikołu Statkieviča, viadoŭca mitynhu ŭ Vilni adznačyŭ: «Kroŭ pradstaŭnikoŭ hetaha narodu, biełarusaŭ, liłasia i na hetaj płoščy, na Łukiškach».
Statkievič: «My nie vybirali idealahičnych raskładaŭ, nas cikaviła, jak ludzi śviatkujuć»
Mikoła Statkievič paćvierdziŭ Svabodzie, što jany ź Niaklajevym sapraŭdy pryjaždžali ŭ Vilniu pahladzieć, jak prachodziać śviatkavańni, pavinšavać litoŭski narod ź jaho śviatam.
«My nie zvažali na toje, jakija palityčnyja, hramadzkija siły arhanizoŭvajuć šeści, mitynhi. Nas cikaviła, jak ludzi śviatkujuć, kolki ludziej prychodzić, što robić palicyja. U nas było vinšavańnie ad Biełaruskaha nacyjanalnaha kanhresu, nu i taksama pahladzieli, jak tam arhanizavanyja śviatočnyja šeści.
Ja razumieju, što pierad 25 sakavika na arhanizataraŭ śviatočnaha šeścia vylivajecca ź luboj nahody i biez nahody kuča hrazi. Ale što da ŭdziełu ŭ šeści nacyjanalistaŭ u Vilni, my nie vybirali niejkich idealahičnych raskładaŭ», — tłumačyć Mikoła Statkievič.
Adamkovič: «Źjaviŭšysia na maršy nacyjanalistaŭ, biełaruskija palityki hulali z ahniom»
Staršynia Tavarystva biełaruskaj kultury ŭ Litvie Alaksandar Adamkovič kaža, što ŭdzieł biełaruskich palitykaŭ u šeści nacyjanalistaŭ zastaŭsia amal niezaŭvažanym, biez šyrokaha abmierkavańnia ŭ asiarodku vilenskich biełarusaŭ.
«Ale ad siabie skažu, što takoha ŭzroŭniu palitykam treba być bolš aściarožnymi — i ŭ vykazvańniach, i va ŭdziele ŭ takich maršach.
Prysutnaja na mitynhu publika nie zrazumieła, što Niaklajeŭ mieŭ na ŭvazie. Niaklajeŭ mieŭ na ŭvazie, što Litva — heta Biełaruś, a narod dumaŭ i ŭsprymaŭ, jak «Letuva» — litoŭskaja dziaržava. Tamu što kali Biełaruś nazyvajuć Litvoj, litoŭcaŭ heta vielmi kryŭdzić. Źjaviŭšysia na maršy nacyjanalistaŭ, biełaruskija palityki hulali z ahniom. Ja naahuł liču, što maršy nacyjanalistaŭ — heta ŭnutranaja sprava Litvy i litoŭcaŭ, i my, biełarusy, nie pavinny ŭ hetym udzielničać», — pierakanany Alaksandar Adamkovič.
