U Ministerstvie adukacyi nie bačać prablemy z mahčymaściu vučycca pa-biełarusku. Tam miarkujuć, što prosta niama achvotnych zapisvacca ŭ biełaruskamoŭnyja kłasy. Čynoŭniki zapeŭnivajuć baćkoŭ, što hatovyja znajści patrebnyja kłasy, praŭda, daloka ad doma.
«Varta pačynać ź siabie. Nichto nie pieraškadžaje razmaŭlać ź dziciem pa-biełarusku, vychoŭvać jaho pa-biełarusku», — cytuje ahienctva «Interfaks» pradstaŭnikoŭ Ministerstva adukacyi.
Ministr adukacyi Ihar Karpienka, pres-sakratarka viedamstva Ludmiła Vysockaja i rabotnik pres-centra Andrej Łazutkin.
Vykazvańnie pradstaŭnikoŭ Ministerstva adukacyi vyklikała abureńnie ŭ fejsbuku.
«Heta prosta hamon!» — adreahavała Alaksandra Bajaryna.
«Varta pačynać ź siabie. Nu dyk, ministerstva adukacyi, pačnicie ź siabie! Stańcie niamymi na nieabmiežavany čas. Nie razmaŭlajcie, nie pišycie, nie čytajcie. Atačycie siabie kitajskaj movaj i pakutujcie, — prapanavała Kaciaryna Paryžackaja. — Što heta, kali nie instytucyjaliziravanaja dyskryminacyja? Parazity na padatkach».
«Hetyja ludzi prosta adkryta ździekujucca z nas. Biaz hučnaha ahulnaha hramadzkaha cisku jany nie sastupiać. Ale jany sastupiać, kali my sami zrazumiejem, što važna, a što niavažna. I budziem usie razam nastojvać na tym, što sapraŭdy važna. Krok za krokam treba viartać toje, što nam naležyć i pa praŭdzie, i pa zakonie», — upeŭnieny Michaił Bajaryn.
Jon zaklikaje padpisać pietycyju ŭ padtrymku biełaruskamoŭnych sadkoŭ: «Heta niaciažka. I niaciažka zaklikać inšych jaje padtrymać. Heta minimum, jaki moža zrabić kožny».
* * *
Ministr adukacyi — Ihar Karpienka. Naradziŭsia ŭ 1964 hodzie ŭ horadzie Navakuźniecku Kiemieraŭskaj vobłaści. Były staršynia Kamunistyčnaj partyi Biełarusi.
