U Barysavie sudziać praparščyka z 72-ha vučebnaha centra ŭ Piačach, paviedamlaje Tut.by. Heta sprava nie źviazana sa śmierciu Koržyča, choć była zaviedzienaja paśla tatalnaj pravierki ŭ častcy. Mužčynu abvinavačvajuć u pieravyšeńni paŭnamoctvaŭ, abrazie sałdat i atrymańni ad ich chabaraŭ. Sud pačaŭsia jašče ŭ lutym, ale pra praces stała viadoma tolki siońnia.
Fota: Volha Šukajła, Tut.by.
Na sudovaj łavie — 25-hadovy praparščyk Ihar Chiščanka z 59-j škoły, dzie rychtujuć śpiecyjalistaŭ pa ekspłuatacyi i ramoncie aŭtatechniki. Na pieryjad razhladu jaho adchilili ad słužby i ŭziali pad vartu.
Mužčynu abvinavačvajuć adrazu pa troch artykułach Kryminalnaha kodeksa. I kali za abrazu sałdat jamu pahražaje tolki aryšt na niekalki miesiacaŭ, to za pieravyšeńnie paŭnamoctvaŭ abo chabar — ad 3 da 10 hadoŭ pazbaŭleńnia voli.
Paciarpiełymi pa spravie pryznanyja 18 čałaviek, jakija prachodzili słužbu ŭ Piačach ŭ 2016-m. U asnoŭnym tady jany byli radavymi i padparadkoŭvalisia starejšamu pa zvańni Iharu Chiščanku. Jašče amal dva dziasiatki čałaviek, kalehi, prachodziać śviedkami.
Chłopcy ŭžo adsłužyli i viarnulisia dadomu ŭ roznyja harady i vobłaści Biełarusi. Tamu ciapier ich dapytvajuć pa videasuviazi. Niekatoryja ŭ dziejańniach praparščyka nie bačać čahości «kryminalnaha», ale pryznajuć: u statucie takoje nie prapisana.
Pa materyjałach spravy, Chiščanka nie raz biŭ sałdat śpiecyjalnym skrutkam z haziet, pieramatanym skotčam. Abo ŭkazkaj, jakaja adnojčy złamałasia ad udaru.
U materyjałach spravy značycca, što praparščyk karaŭ padnačalenych fizičnymi praktykavańniami paśla zaniatkaŭ. Naprykład, «finski łyžnik» (ruki za hałavu i skački z adnaho kalena na inšaje) abo «Koka-Džamba» (prysiadańnie i skačok z hetaha stanovišča ŭvierch z vyciahnutymi rukami). Kab uskładnić zadaču, sałdata prymušali apranać broniekamizelku abo procihaz.
Paciarpieły Anton Prybytkin, 24-hadovy traktaryst z Kamianieckaha rajona, dobra pamiataje pra vykarystańnie elektrošokiera abvinavačanym.
Taksama paciarpieły atrymlivaŭ pa jahadzicach skrutkam z haziet za «napeŭna, ja pieraškodziŭ prajści», a jašče ukazkaj. Pamiataje, jak chadziŭ z tavaryšami ŭ bufiet, za što «treba było niešta kupić praparščyku». Naprykład, pačak cyharet. Inšyja raspaviali, jak kuplali praparščyku picu ci koka-kołu. Usio za svoj košt.
Śledčym chłopiec taksama kazaŭ, što praparščyk pastajanna słovami prynižaŭ kursantaŭ: «Nie viedaju, ź jakoj pryčyny, zdavałasia, što my viečna ŭsio robim nie tak».
Advakat praparščyka ŭdakładniła ŭ paciarpiełaha, ci prynižalisia takim čynam jaho honar i hodnaść? Chłopiec kaža, što nie.
— A kali try narady pa-za čarhoj, taksama b nie zakranuła? — udakładniŭ sudździa.
— Nie.
— Tak što dla vas lepiej: pajści ŭ narad ci?..
— Kali ščyra, mnie ŭ naradzie nie padabałasia, lepš atrymać pa jahadzicach, — śmiejučysia, zajaviŭ małady čałaviek.
— Heta značyć, u carskaj armii vy b pryžylisia …
Na pytańnie suda, jakoje pakarańnie varta pryznačyć praparščyku, abodva adkazali: stroha nie treba.
U adroźnieńnie ad inšych dapytanych, 25-hadovy śviedka Uładzisłaŭ Abuchoŭski adrazu zajaviŭ: u jaho staŭleńnie da fihuranta zusim nie «narmalnaje».
— U jaho zaŭsiody była niepryjaznaść da sałdataŭ. Uviečary «razdavaŭ»: kamu skrutkam pa hałavie, kamu pa plačach. Dziela zabavy, napeŭna, — raspaviadaje były radavy, a ciapier pracaŭnik vahonnaha depo. Pavodle jaho słoŭ, sałdaty pry hetym ničoha nie parušali.
A voś za parušeńni praparščyk karaŭ ramianiom, biŭ navat u mašonku.
Ci pryznaje sam praparščyk vinu, pakul nieviadoma. Jaho jašče nie dapytvali ŭ sudzie. Choć adzin z paciarpiełych zhadaŭ: padčas ich vočnaj staŭki Chiščanka prasiŭ prabačeńnia, «što niapravilna rabiŭ».
Vajskoŭcu pradjaŭlenaje abvinavačvańnie pa č.1,2 art. 430 (Atrymańnie chabaru, paŭtorna), art. 444 (Abraza načalnikam padnačalenaha ŭ suviazi z vykanańniem abaviazkaŭ vajskovaj słužby), č.1 art. 455 (Złoŭžyvańnie ŭładaj abo słužbovymi paŭnamoctvami), č.2 art. 455 (Pieravyšeńnie paŭnamoctvami, spałučanaje z hvałtam), a taksama pa č.1 art. 14 i č.2 art. 455 (Zamach na pieravyšeńnie ŭłady abo paŭnamoctvaŭ).
