Prajazdžaŭ pa Aršanskim rajonie, kinułasia ŭ vočy, što praktyčna ŭ kožnaj vioscy jość kramy, jarka ŭpryhožanyja zialonymi šarykami i šyldami «My adčynilisia». Heta na płoščach, jakija naležać Aršanskamu rajpo, vielmi šustra paadkryvalisia «Jeŭraopty», piša ŭ «Našu Nivu» čytač Andrej.
Z adnaho boku, dla žycharoŭ małych nasielenych punktaŭ sucelnaja radaść — kupić usio «pa akcyi» biez naviedvańnia horada.
Z druhoha boku, uźnikaje pytańnie: čamu hienijalnyja rajpoŭskija kiraŭniki nie zmahli zabiaśpiečyć u svaich kramach sučasny ŭzrovień absłuhoŭvańnia, asartymient, kankurentnyja ceny? Jak tak atrymałasia, što kirujučy dziaržaŭnaj, pa sutnaści našaj z vami ułasnaściu, daviali jaje faktyčna da bankructva? Chto ŭ hetym vinavaty i što za heta atrymaŭ?
I ŭžo zusim nikomu nie cikavy los miascovaha roźničnaha biznesu, jaki hetaja sietka prosta zabivaje. Pakul u paradku ekśpierymientu pahłynańnie miascovaha rajpo adbyvajecca tolki ŭ Aršanskim rajonie (napeŭna, heta i jość ŭźniaćcie z ruin i popiełu), ale hetaja sietka hatovaja prakrucić padobnuju apieracyju pa ŭsioj krainie. I adnojčy ŭvieś razdrobny handal u krainie budzie naležać adnamu haspadaru, i budzie sucelny «Jeŭraopt», pad jakija b jahadki abo bonściki jon nie maskavaŭsia pry dapamozie dobraj mahii.
