«Adbudujem Minsk u dapoŭnienaj realnaści» — taki prajekt raspačaŭsia na płatformie Talaka.by.
Jaho meta — adnavić budynki Vilenskaha vakzała, luteranskaj kirchi i kaścioła Śviatoha Vojciecha ŭ virtualnym vyhladzie. Adradžać histaryčny Minsk padobnym sposabam uziałasia kampanija Chronosphere.
Prajekt «Adbudujem Minsk u dapoŭnienaj realnaści» daść mahčymaść minčanam i turystam «naviedać» try važnyja abjekty stalicy, jakija ŭžo nie isnujuć.
Uładalniki sučasnych hadžetaŭ zmohuć pabačyć, jak dakładna vyhladali histaryčnyja budynki, jak jany ciapier upisanyja ŭ haradski łandšaft. Ekskursavody zmohuć demanstravać turystam stary Minsk.
Na dadzieny momant kampanija Chronosphere maje dadatak na AppStore z anałahičnaj nazvaj. Usie achvotnyja ŭžo mohuć pabačyć u virtualnaj realnaści Kaścioł Tamaša Akvinskaha, jaki znachodziŭsia na Kastryčnickaj płoščy, Archirejskaje padvorje (tam, dzie zaraz Dom aficeraŭ) i Dom Čapskaha.
Kampanija Chronosphere vystupiła sponsaram adnoj z ekskursij Festa ekskursavodaŭ, jaki prajšoŭ u Minsku ŭ krasaviku. Ekskursanty prajšlisia pa centry stalicy i praz płanšety i mabilnyja telefony pahladzieli na Minsk XVII-XIX st. Padčas ekskursii stała vidavočna: kali ŭ Minsku źjaviacca sotni budynkaŭ u dapoŭnienaj realnaści, naš horad stanie značna cikaviejšym miescam dla žyćcia i pryvabnaj kropkaj dla turystaŭ. A Biełaruś — umacuje status it-krainy.
Dapoŭnienaja realnaść — technałohija sumiaščeńnia realnych i virtualnych abjektaŭ na ekranie hadžeta.
Čałaviek moža na svaim mabilnym telefonie abo płanšecie bačyć histaryčnyja pabudovy, jakija daŭno źnikli. Hetyja abjekty buduć znachodzicca pobač z realnymi budynkami, što stvaraje niepaŭtorny efiekt pahružeńnia ŭ minułaje.
