Ja trapiŭ u Varšavu pieršy raz za doŭhi čas. Mnie było što paraŭnoŭvać, pahatoŭ što 10 hadoŭ tamu mnie ŭ Varšavie daviałosia adpracavać ceły hod. Za 10 hadoŭ prahres adčuvalny.
Darohi idealnyja
Darohi idealnyja. Jak aŭtamabilist, ja heta adčuŭ na sabie najpierš. U nas jany łatanyja-pierałatanyja, u Varšavie roŭnieńkija. U nas raźmietka paśla zimy adsutničaje, bo naniesienaja jana tannaj farbaj, a ŭ Varšavie jaje nanosiać stojkim, reljefnym materyjałam, i jana paŭsiudnaja.
Termafutra
U Varšavie, zdajecca, nie zastałosia niaŭcieplenych šmatpaviarchovikaŭ. Usie budynki savieckaha času atrymali termafutra. U Minsku šeryja panelki pa-raniejšamu składajuć vialikuju častku žyłoha fondu.
Husta kusty
Varšava husta zasadžanaja kustami i kustarničkami. Jany raździalajuć prastoru na zialonyja zony. Adździalajuć damy i robiać utulnymi dvary. U Miensku ich našmat mienš, asabliva chvojnych.
«Časny siektar»
Varšaŭskija katedžavyja rajony ŭ miežach horada vyrazna adroźnivajucca ad našaha «časnaha siektara». U našym značnuju dolu składajuć pa-raniejšamu draŭlanyja ci zbudavanyja «z taho, što było», damy. Abšyrny varšaŭski pryvatny siektar, nasieleny siarednim kłasam, vyhladaje lepš za našy Drazdy, nasielenyja elitaj. Ale damki stajać cieśnieńka, ziamla darahaja.
Vaj-faj
Vaj-faj šmat dzie biaspłatny. U aeraporcie, u ciahnikach, aŭtobusach — u nas i blizka takoha niama. A heta vialikaja zručnaść i dla ekanamičnaj dziejnaści, i dla studentaŭ.
VUP i za VUPam
Uvohule, Polšča adarvałasia ad Biełarusi ŭ ekanamičnym raźvićci. Pakul nas pałochali šokavaj terapijaj i zavablivali ŭ Tajožny sajuz, Polšča rvanuła. Siaredni zarobak u Polščy abhaniaje biełaruski ŭžo ŭtraja. Uražvaje i stan dziaržaŭnych finansaŭ: dziaržava tut raspačała ščodryja vypłaty siemjam ź dziećmi. Zołatavalutnyja reziervy Polščy pieravyšajuć 119 miljardaŭ dalaraŭ. Adkul usio heta biarecca? Efiektyŭnaja ekanomika. Z nazirańniaŭ jašče: nakolki nie prosta mierkavać pra stan ekanomiki pa VUP. Jaho pakazčyk na dušu nasielnictva ŭ Polščy mała roźnicca ad litoŭskaha. Ale kantrast va ŭzroŭni žyćcia vialiki. Infrastruktura Vilni vyhladaje na paradak słabiejšaj. Damy ŭ ludziej biadniejšyja, zakinutych budynkaŭ bolš. A ŭ nas u Biełarusi ich jašče bolš.
Travy nie kosiać
Travu vakoł tras, vulic i ŭ parkach tut nie kosiać «dla pryhažości». U hetym siezonie jaje jašče ni razu nie kasili. U nas jaje kosiać pieryjadyčna — bienzin tanny, jak i pracoŭnaja siła. A palaki ličać kamunalnyja hrošy. Nu i kisłarodu bolš. Mnie to bolš padabajecca, kali pakošana. Ale fakt staŭleńnia palakaŭ da trat pakazalny.
Chopin International Airport
Padarožžy samalotam pierastali być raskošaj dla siaredniaha palaka. Try najbolšyja aeraporty Polščy prapuścili ŭ 2017-m 26,1 młn pasažyraŭ. Minski — 4,1. A kolkaść nasielnictva ŭ krainach adroźnivajecca tolki ŭ 4 razy. Aeraport Varšavy, darečy, nosić imia viadomaha palaka — Frederyka Šapena. Druhi pa pamiery, Krakava, — Jana Paŭła II. Treci, u Hdańsku, — Lecha Vałensy.
Demakratyja
Urad Zakona i spraviadlivaści vinavaciać u aŭtarytarnych zamaškach, ale apazicyja ŭ krainie zasiadaje ŭ parłamiencie, ŚMI pluralistyčnyja. Uklučyŭ televizar, dziaržaŭny kanał TVPInfo, jaki ŭ Polščy nazyvajuć TV-Pis. Navat tut u dyskusijnych pieradačach abaviazkova ŭdzielničaje niechta z apazicyi.
Čarešni i cisy
A jašče ŭ Varšavie ŭžo pieraćvitaje lipa, śpiejuć čarešni, a žyvyja aharodžy časta vysadžanyja ź cisu. Paŭdnioviej, što ty zrobiš.
P.S. I tak, u Varšavie ŭsio jašče havorać pa-polsku, a ŭ Minsku — na movie susiedniaj dziaržavy.
