U prahramie «Viaskoŭcy» telekanała «Biełsat» — niezvyčajnaja viaskovaja impreza, jakaja tryvała cełuju noč siarod kviecieni majskaha sadu.
Kab paviesialicca, paśpiavać i patancavać pad niebam, u Zaścienak Skrypleva pad Vałožynam źjechalisia entuzijasty dy amatary narodnaj kultury z navakolnych sieliščaŭ dy z bolš dalokich haradoŭ i miastečak.
Viadoŭca Viktar Šukiełovič sam puściŭsia ŭ tancy, pavadziŭ karahody, pasłuchaŭ pieśni i prypieŭki, a taksama parazmaŭlaŭ sa šmatlikimi ŭdzielnikami festu dy pieražyŭ mnostva pryhod.
Žycharki vioski Dubiny raspaviali jamu, što raniej padčas tancavalnych viečarynak ažno kureła padłoha, i kab pył asieŭ, na padłohu lili vadu. Pierad pačatkam imprezy ŭ belku taksama ŭhaniali siakieru i skakali da toj pary, pakul siakiera nie vypadała. Adna z žančyn padzialiłasia, što choć i dačakałasia stałaha vieku, padobnyja śviaty znoŭ viartajuć jaje ŭ maładość.
9-cihadovy Mikałaj raspavioŭ Viktaru, adkul u jaho ŭziałosia zachapleńnie muzykaj i biełaruskimi tradycyjami, a taksama padzialiŭsia svajmi žyćciovymi płanami na budučyniu.
A režysiorka i tancorka z Barysava Natalla Hołava raspaviała, adkul u biełaruskich vioskach źjavilisia takija tancy, jak «Žydok», «Žydovačka» dy «Nažnički».
Viktar spatkaŭ taksama ŭ Zaścienku Skrypleva ambasadarku Vialikaj Brytanii ŭ Biełarusi Fijonu Hib, ź jakoj taksama patancavaŭ, raspytaŭ pra ŭražańni, a taksama parazmaŭlaŭ pra padabienstva i adroźnieńni biełaruskich i brytanskich viosak.
