Žurnalistka TUT.BY paprasiła kiraŭnika viedamstva patłumačyć, što miełasia na ŭvazie pad słovami «My — za sapraŭdnaje, jany nie projduć» u kamientary z nahody vyviešanaha ŁHBT-ściaha na ambasadzie Vialikabrytanii.

— Kudy jany nie projduć? — udakładnili my.

— Nikudy nie projduć! — rastłumačyŭ ministr.

— Što majecca na ŭvazie?

— Što vy majecie na ŭvazie, to i možacie dumać. Ministerstva ŭnutranych spraŭ achoŭvaje hramadski paradak i maralnaść u našaj krainie. Zališnija kamientary davać tut nie liču mahčymym i nieabchodnym. Usie razumiejuć, pra što idzie havorka. Heta nie łaźnia: niama ni hołych, ni durnych, jak Hocman kazaŭ [ministr cytuje hałoŭnaha hieroja sieryjała «Likvidacyja». — Zaŭv.TUT.BY)]. Tamu ja ničoha nie dadam da taho, što skazaŭ. Choć mahu skazać u pryncypie. Skažu tak: mierkavańnie pryvatnaje, nie ministra ŭnutranych spraŭ, a hramadzianina Respubliki Biełaruś. Heta była peŭnaja pravierka našaj hramadzianskaj supolnaści na śpiełaść. Naša hramadzianskaja supolnaść nie zusim prajšła hetuju pravierku. Ni adna z hramadskich arhanizacyj, abjadnańniaŭ hrup asobaŭ nie aburyłasia hetym faktam i nie zapatrabavała źniać hety pradmiet, jaki, darečy kažučy, byŭ vyviešany ŭ parušeńnie Vienskaj kanviencyi ab dypłamatyčnych adnosinach. Na žal, ni relihijnyja arhanizacyi, ni hramadskija nie adreahavali na heta. Moža być, my sapraŭdy vielmi talerantny narod u hetym sensie. Pazicyja Ministerstva ŭnutranych spraŭ prapisanaja vyrazna, tam napisana litaralna, i nie bolš, i nie mienš. Vielmi dypłamatyčna, karektna, biez hrubijanstvaŭ, ale ŭ toj ža čas adkazna, pa-dziaržaŭnamu, — zajaviŭ Ihar Šunievič.

Taksama ministr zaŭvažyŭ, što ličyć, što ŭ Biełarusi niama dyskryminacyi.

— Viedajecie, jak dyskryminacyja? My ž dyskryminujem złačyncaŭ u niejkaj stupieni, pravilna? Jość peŭnyja hrupy hramadzian, jakija ŭ toj ci inšaj stupieni padviarhalisia i buduć padviarhacca, jak jany sami ličać, niejkaj dyskryminacyi. Ja tak nie liču. Ja liču, što nijakaj dyskryminacyi ŭ nas niama, jość praviły suisnavańnia akramia zakonaŭ, jakija pavinny pavažać usie, u tym liku i pradstaŭniki zamiežnych dziaržaŭ. U hetym jość taksama dypłamatyja. U hetym jość i pluralizm: jość adno mierkavańnie, pavinna isnavać i inšaje mierkavańnie. Naša mierkavańnie — čytajcie dva apošnija słovy z vystupleńnia, bryfinhu, paviedamleńnia MUS, — skazaŭ jon.

Nahadajem, 20 maja na sajcie MUS byŭ raźmieščany kamientar, datyčny dziejańniaŭ pasolstva Vialikabrytanii, jakoje 17 maja, u Mižnarodny dzień baraćby z hamafobijaj, transfobijaj i bifobijaj vyviesiła ŁHBT-ściah. U im baraćba ŁHBT-supolnaści za svaje pravy była nazvanaja padrobkaj, jak i sami adnapołyja adnosiny.

MUS taksama adznačyŭ, što «pieravažnaja bolšaść biełarusaŭ prytrymlivajecca tradycyjnych siamiejnych kaštoŭnaściaŭ, u tym liku chryścijanskich», tamu zajavy padobnaha rodu — vyklik hetym kaštoŭnaściam.

— My — za sapraŭdnaje, jany nie projduć! — reziumavali ŭ siłavym viedamstvie.

Paźniej zajavu MUS prakamientavaŭ i jaho kiraŭnik Ihar Šunievič. Jon adznačyŭ, što heta «ŭnutranaja sprava, u tym liku i našaha ministerstva». Tamu padnačalenaje jamu viedamstva nie mahło pakinuć biez uvahi źjaŭleńnie na budynku ambasady hetaha «atrybutu» [tak ministr nazvaŭ ŁHBT-ściah. — Zaŭv. TUT.BY].

— Ja heta nazyvaju prapahandaj taho ładu žyćcia, jaki dla nas nieprymalny. Heta asnoŭny matyŭ, jaki zaachvociŭ nas praź niekatory čas dać svoj kamientar, — rastłumačyŭ Šunievič.

Клас
0
Панылы сорам
0
Ха-ха
0
Ого
0
Сумна
0
Абуральна
0