Raspačaŭsia čarhovy siezon Premii imia Ježy Hiedrojca. Na hałoŭny pryz pretendujuć 32 knihi, napisanyja ŭ 2017 hodzie na biełaruskaj movie, u žanrach mastackaj i dakumientalnaj prozy.

Nižej ahlad knih, jakija buduć udzielničać u Premii, ad vydaviectva «Halijafy».

Vikiencij Maroz. «Pieražytaje-niezabytaje»

Narodžany na Niaśvižčynie ŭ biełaruskaj siamji, siabra Sajuza biełaruskaj moładzi padčas vučoby ŭ Niaśvižskaj nastaŭnickaj sieminaryi ŭ hady akupacyi, žaŭnier Druhoj armii Vojska Polskaha ŭ Druhoj suśvietnaj vajnie, nastaŭnik movy i litaratury ŭ mirnym pracoŭnym žyćci…

Kniha Vikiencija Maroza «Pieražytaje-niezabytaje» — heta nie tolki ekzistencyja asabistaha žyćcia čałavieka z pakručastym losam na dramatyčnych złomach biełaruskaj historyi, ale i žyvy vyrazny adbitak składanaha i trahičnaha času, jaki ŭvabraŭ i žyćcio pad Polščaj, i pieršyja Saviety, i žyćcio pad akupacyjaj, i vajnu, jakoj addadzieny dva z pałovaj hady, i paślavajenny pieryjad z usimi jaho kalizijami.

 

Maksim Kutuzaŭ. «Kniaź-vaŭkałak»

Ludzi zvyčajna dumajuć, što žyćcio kniazia pryjemnaje i bieskłapotnaje. Adnak ci jano takoje na samoj spravie? Ci možna nazvać bieskłapotnym žyćcio, kali pahroza varožaha miača i zdradnickaha kinžała zaŭsiody pobač? Kali nielha być upeŭnienym: chto źjaŭlajecca siabram, a chto tolki robić vyhlad?.. Kali nie možaš zrabić nivodnaha kroku biez zhody daradcaŭ? Ale kali kniaziu pašancavała naradzicca vaŭkałakam, pierad im adkryvajucca zusim inšyja mahčyma­ści. Hałoŭnaje — viedać, jak imi skarystacca…

 

Źmicier Kustoŭski. «Prytułak»

Małady emihrant nie moža razabracca ŭ svaim unutranym śviecie. Vydumanyja chimiery ledź nie razburajuć hałoŭnaha hieroja. Jahonaja baraćba — heta baraćba z samim saboj. Što ŭ vyniku? Aŭtar nie škaduje hieroja — kidaje jaho ŭ samyja nievierahodnyja situacyi, prymušaje rabić nieabdumanyja kroki, i ŭ rešcie rešt zdajecca, što vyratoŭvaje… Adkul jon i kudy ruchajecca? Hetaje i druhija pytańni mižvoli paŭstajuć pry čytańni tvora. 

Heta kniha pra emihracyju i ŭcioki ad samoha siabie.

 

Franc Siŭko. «Štrychkody»

Słoŭnaja ekvilibrystyka ŭ pracesie piśma cikavić aŭtara knihi ŭ toj stupieni, u jakoj spryjaje najbolš dakładnaj padačy fakta. Hoły fakt, tak by mović, štrychkod rečy, padziei, uražańnia pry hraničnaj ścisłaści mastackaha azdableńnia — voś jaho meta ŭ takim žanry, jak ese. Słova dla jaho — materyjał, ź jakim jon padčas pracy abychodzicca i davoli biescyrymonna, i razam z tym — pavažliva. Pra što i śviedčyć dadzieny zbornik ese, składzieny z užo drukavanych raniej i novych tvoraŭ.

 

Michaś Ziziuk. «Płankton»

 

U knizie Michasia Ziziuka znojducca tvory dla amataraŭ samych roznych žanraŭ: pryhodnickaj i mistyčna-fantastyčnaj apovieści, psichałahičnaha apaviadańnia, vandroŭna-padarožnych narysaŭ… Ale ŭsie hetyja tvory abjadnoŭvaje ščyraja luboŭ da čałavieka, pryrody, rodnaj ziamli. Adrasujecca šyrokamu kołu čytačoŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0