Ličycca, što prykładna kožny vośmy čałaviek va ŭzroście za 50 hod maje deficyt vitaminu B12. Taksama i strohija vehietaryjancy majuć padvyšanuju ryzyku chraničnaha niedachopu hetaha rečyva.
Vitamin B12 (kabałamin) znachodzicca amal vyklučna ŭ praduktach žyviolnaha pachodžańnia: miasie, rybie, małočnych praduktach, jajkach. Strohija vehietaryjancy, jakija takich praduktaŭ nie ŭžyvajuć, nie pavinny zabyvać peryjadyčna prymać hety vitamin u vyhladzie dadatkaŭ, papiaredžvaje Radyjo Svaboda.
Funkcyi B12
Vitamin B12 nieabchodny dla vytvorčaści čyrvonych kryvianych kletak albo erytracytaŭ. Erytracyty, u svaju čarhu, nieabchodnyja dla transpartu kisłarodu ŭ kryvi.
Akramia taho, vitamin V12 nieabchodny dla naležnaha funkcyjanavańnia nervovaj systemy: B12 padtrymlivaje ŭ zdarovym stanie abałonku nervovych vałoknaŭ i harantuje ich narmalny rost.
Razam z falijnaj kisłatoj (vitaminam B11) B12 adkazvaje za syntez DNK i RNK. Aktyvacyja falijnaj kisłaty ŭ našym arhaniźmie zaležyć ad najaŭnaści B12. To bok, deficyt B12 moža pryvieści i da deficytu falijnaj kisłaty.
Kolki B12 nam patrebna
V12 źjaŭlajecca adzinym vodaraspuščalnym vitaminam, jaki naš arhanizm moža nazapašvać i zachoŭvać doŭhi čas. Naša piečań maje zapas V12 — prykładna 2-5 milihram. Na pieršy pohlad, heta niašmat. Ale rekamendujemaja sutačnaja norma vitaminu B12 dla žančyn i mužčyn va ŭzroście 19-70 hadoŭ — 2,8 mikrahrama. Heta kolkaść paraŭnalnaja z vahoj atramantu u kropcy ŭ kancy skazu!
Tak što zapasu ŭ piečani moža chapić na 2-5 hadoŭ, u siarednim — na try hady. Tak što asobam, jakija całkam vyklučyli sa svajho racyjonu ŭsie žyviolnyja pradukty, zapasu B12 moža chapić na try hady.
Jak arhanizm spažyvaje V12
Adnak deficyt B12 — dosyć častaja źjava, u tym liku i siarod miasajedaŭ. Čamu? Deficyt hetaha vitaminu čaściej za ŭsio ŭźnikaje nie z pryčyny jaho niedastatkovaści ŭ racyjonie, a z pryčyny parušeńnia jaho ŭsmoktvańnia.
Voś, koratka, jak adbyvajecca hety praces. U straŭniku pad dziejańniem salanaj kisłaty i enzymu pepsinu adbyvajecca vyzvaleńnie B12 z praduktaŭ charčavańnia.
Dalej u tonkaj kišcy B12 złučajecca z tak zvanym unutranym faktaram (taksama viadomym jak faktar Kasła) i padarožničaje razam ź im da kanca tonkaj kiški. Tam admysłovyja receptary raspaznajuć vitamin B12 (ale tolki kali jon u kampanii faktaru Kasła!), paśla čaho pačynajecca pastupovaje ŭsmoktvańnie vitaminu B12 ŭ kroŭ.
B12 ŭ małych dozach pastajanna pastupaje ŭ žoŭć, dalej — u kišečnik, i adtul jon znoŭ traplaje ŭ kroŭ. Cykł praciahvajecca doŭhija miesiacy.
Pryčyny deficytu
Niedachop u arhaniźmie salanaj kisłaty albo ŭnutranaha faktaru (jak u vypadku z atrafičnym hastrytam) pryvodzić da taho, što vitamin B12 nie zasvojvajecca. U takim vypadku nieabchodnyja injekcyi (raz u niekalki miesiacaŭ) abo nazalnaje spažyvańnie vitaminu B12.
Parušeńnie ŭsmoktvańnia vitaminu V12 moža taksama być nastupstvam pankreatytu, straŭnikava-kišačnaha chirurhičnaha ŭmiašańnia abo pryniaćcia niekatorych medykamentaŭ.
Časta B12 brakuje ŭ asob stałaha ŭzrostu, bo ŭ ich čaściej nie chapaje albo salanaj kisłaty, albo ŭnutranaha faktaru.
Nastupstvy deficytu
Deficyt vitaminu V12 moža pravieści da tak zvanaj miehałabłasnaj anemii. Niekatoryja symptomy: stomlenaść, hałavakružeńnie, pačaščanaje sercabićcie, zvon u vušach. Hetaja forma anemii čaściej sustrakajecca ŭ asob stałaha ŭzrostu, ale inšyja ŭzrostavyja hrupy ad jaje nie zastrachavanyja.
Da taho ž, deficyt vitaminu V12 moža mieć neŭrałhičnyja nastupstvy: pakołvańnie ŭ palcach (parestezija), strata pamiaci, parušeńnie kaardynacyi, myšačnaja słabaść u nahach. Krytyčny deficyt B12 pryvodzić da niezvarotnaha paškodžańnia nervaŭ i paraliču.
Ni ŭ jakim razie nia varta zajmacca samalačeńniem. Kali vy vyjavili ŭ siabie jakija-niebudź z vyšejapisanych symptomaŭ, źviarniciesia pa medyčnuju dapamohu. Pa vynikach analizaŭ lekar pastavić dakładny dyjahnaz i pryznačyć adpaviednaje lačeńnie.
Dzie brać B12
Jak havaryłasia vyšej, vitamin B12 utrymlivajecca praktyčna vyklučna ŭ praduktach žyviolnaha pachodžańnia. Vodaraści, hryby i fermentavanyja sojevyja pradukty ŭtrymlivajuć niekatoruju kolkaść B12, ale ŭ nie aktyŭnaj formie. Ličycca, što B12 z raślinnych krynic nie zasvojvajecca.
Nastupnyja charčovyja pradukty majuć istotnuju kolkaść B12:
• 1 šklanka niatłustaha małaka (150 mł): 0,6 mkh;
• Johurt ź nizkim utrymańniem tłušču (200 mł): 1 mkh;
• 1 kavałak pryhatavanaj jałavičyny (75 h): 2,5 mkh;
• 1 kavałak pryhatavanaj śvininy (75 h): 0,8 mkh;
• 1 kavałak pryhatavanaj traski (100 h): 2,0 mkh;
• 1 jajka: 0,6 mkh.
Cikavy fakt: mikrachvalevaja pieč razburaje B12.
