U studzieni 2018 hoda dvaich biełarusaŭ — Mikitu Vaładźko i Adama Bialackaha — prysudzili da turemnych terminaŭ u Polščy. Chłopcaŭ pakarali za akcyju, jakuju jany praviali ŭ Aśviencimie, tady jany raspranulisia i zabili jahnia.
Prajšło paŭhoda, ale i Vaładźko, i Bialacki pakul što na voli. Jany čakajuć razhladu apielacyi, jakuju padali adrazu paśla prysudu.
Akcyja ŭ Aśviencimie prajšła jašče ŭ sakaviku 2017 hoda. Tady Bialacki, Vaładźko i jašče niekalki čałaviek (palaki, biełarusy, hramadzianin Hiermanii) raspranulisia dahała i zaviesili łozunh «Arbeit Macht Frei» raściažkaj z nadpisam «Love». Jany sprabavali prykavać siabie adzin da adnaho kajdankami. Padčas akcyi Bialacki i Vaładźko zarezali jahnia.
Udzielniki akcyi nazvali jaje antyvajennaj, nakiravanaj suprać uzbrojenych kanfliktaŭ. Praŭda, pa słovach udzielnikaŭ, zabojstva jahniaci nie było zapłanavanym, heta była ideja Bialackaha i Vaładźko.
Sud prajšoŭ u studzieni. Adam Bialacki atrymaŭ 1 hod i 6 miesiacaŭ źniavoleńnia, Mikita Vaładźko — 1 hod i 2 miesiacy. Abodvum zabaranili mieć chatnich žyviołaŭ ciaham 10 hadoŭ plus dali štrafy. Astatnija ŭdzielniki atrymali pa hodu abmiežavańnia voli.
Sud nad udzielnikami akcyi. Fota — Radyjo Svaboda
Vaładźko i Bialacki padali apielacyju, spłacili zakład (štości kala 500 dalaraŭ), tamu zastajucca na voli.
Jak patłumačyŭ «Našaj Nivie» Mikita Vaładźko, vynik razhladu apielacyi budzie viadomy prykładna ŭ vieraśni. Da hetaha času chłopcy pad padpiskaj: nie mohuć vyjazdžać z Polščy i try razy na tydzień musiać naviedvać adździaleńnie palicyi, kab adznačacca. Kali sud vyrašyć adchilić apielacyju, to biełarusaŭ adpraviać za kraty adbyvać terminy.
Mikita Vaładźko. Fota - Radyjo Svaboda
Pakul što chłopcy pracujuć. Jak kaža Vaładźko, «kali atrymlivajecca, to ŭ mastactvie, kali nie, to na hastarbajtarskich pracach». Ale jon pra akcyju nie škaduje.
«Heta ž kruta było!» — kaža Vaładźko. A zabojstva jahniaci ŭ miežach akcyi chłopiec tłumačyć tak: «Akcyja maje padraździeły, jakija robiać jaje krutoj. Niekatoryja pryhožyja, niekatoryja važnyja, a niekatoryja — žachlivyja».
Adam Bialacki. Fota — Radyjo Svaboda
Adam Bialacki taksama paviedamiŭ «Našaj Nivie», što nie škaduje pra akcyju. Na jaho dumku, navat kali daviadziecca pravieści najbližejšyja paŭtara hody za kratami, to akcyja była vartaj hetaha.