Dziarždepartament ZŠA abviaściŭ ab uviadzieńni novych sankcyj suprać Rasii. Padstavaj dla ich stała ataka z vykarystańniem chimičnaj zbroi na terytoryi krainy NATA — atručvańnie eks-pałkoŭnika HRU Siarhieja Skrypala i jaho dački Julii ŭ brytanskim Sołśbiery niervova-paralityčnym rečyvam «Navičok».
U ZŠA pierakananyja, što za atakaj stajała Maskva i, takim čynam, Rasieja parušyła amierykanski Zakon ab kantroli nad chimičnaj i bijałahičnaj zbrojaj i zabaronie jaho vajennaha prymianieńnia ad 1991 hoda. Hety ž zakon prymianiaŭsia ŭ dačynieńni da Siryi i KNDR.
Parušeńnie Zakona ab chimzbroi praduhledžvaje ŭviadzieńnie dvuch raŭndaŭ sankcyj. Pieršy ŭstupić u siłu ŭžo 22 žniŭnia. Druhi ŭvodzicca ŭ vypadku, kali kraina-parušalnica nie vykanała patrabavańniaŭ zakona na praciahu troch miesiacaŭ.
Dadatkovy pakiet sankcyjaŭ padpisvaje prezident ZŠA paśla kansultacyi z Kanhresam.
U Rasii novyja sankcyi nazvali «drakonaŭskimi», piša ahienctva TASS, a kurs rasiejskaha rubla rezka ŭpaŭ.
Pieršy raŭnd sankcyj adnosna miakki
Pad pieršyja abmiežavańni padpadaje ekspart u RF ŭsich «adčuvalnych» tavaraŭ i technałohij, źviazanych sa śfieraj nacyjanalnaj biaśpieki ZŠA.
Vašynhton maje namier zrabić šerah vyklučeńniaŭ z režymu novych sankcyj: jany nie zakranuć kosmas, pasažyrskija avijapieravozki, a taksama prahramy «dapamohi Rasiei i rasiejskamu narodu».
Sankcyi abaviazvajuć Rasieju:
• Nie ŭžyvać chimičnuju abo bijałahičnuju zbroju (u tym liku suprać svaich hramadzianaŭ).
• Padać «pierakanaŭčyja zapeŭnivańni ŭ tym, što jana bolš nie budzie parušać» pałažeńni mižnarodnaha prava.
• Dapuścić «praviadzieńnie inśpiekcyj na miescach AAN i mižnarodnymi niezaležnymi naziralnikami z tym, kab harantavać, što ŭrad nie prymianiaje chimičnuju zbroju».
Druhi raŭnd — vielmi žorstki
Druhaja častka sankcyj praduhledžvaje:
1) Panižeńnie ŭzroŭniu dvuchbakovych dypłamatyčnych adnosin abo navat ich poŭnaje prypynieńnie.
2) Faktyčna, poŭnaja zabarona luboha ekspartu ŭ Rasieju amierykanskich tavaraŭ, za vyklučeńniem praduktaŭ charčavańnia.
3) Zabarona impartu Złučanymi Štatami rasijskich tavaraŭ, uklučajučy naftu i naftapradukty.
4) Pazbaŭleńnie prava na pasadku ŭ ZŠA samalotaŭ luboj avijakampanii, jakaja kantralujecca ŭradam Rasiei (u pieršuju čarhu heta abmiežavańnie moža zakranuć «Aerafłot»).
5) Błakavańnie Vašynhtonam kredytaŭ Maskvie pa linii mižnarodnych finansavych arhanizacyj.
6) Zabaronu na vydaču Rasii kredytaŭ amierykanskich bankaŭ.
Pa zakonie prezident ZŠA pavinien ŭvieści jak minimum try z šaści mier. U Dziarždepie raźličvajuć, što da druhoha pakieta sankcyj nie dojdzie, «ale heta pytańnie chutčej da Rasiei, a nie da nas».
