Ułaśnik mini-hastela ŭ Novaj Ziełandyi tajemna źniaŭ 34 žančyny, jakija prymali duš, piša bbc.com.
Videakamiery jon schavaŭ u butelkach dla šampunia.
Žanaty žychar zaliva Choŭk zrabiŭ 219 schavanych zapisaŭ u pieryjad ad śniežnia 2017 da lutaha 2018. Jon taksama pryznaŭ, što raźmiaściŭ hetyja videa na parnahrafičnych sajtach, niekatoryja navat z apisańniem.
Bolšaść paciarpiełych - žančyny da 30 hadoŭ. Kamiery, jakija zdymali, byli schavanyja takim čynam, što zdymali žanočaje cieła ad plačej da kaleniaŭ, adnak tvary taksama časta traplali ŭ kadr.
Nieviadoma, ci hetyja butelki z kamierami čałaviek zrabiŭ sam, ci nabyŭ u internecie.
Žančyny spynialisia ŭ hateli na roznyja terminy - ad adnoj nočy da dvuch tydniaŭ. Znajści ich udałosia palicyi. U sumiesnaj zajavie jany skazali, što šakavanyja, raźjušanyja, asaromlenyja i źniavažanyja dziejańniami hetaha čałavieka.
Mužčynu aryštavali ŭ lutym. Palicyi jon zajaviŭ, što rabiŭ porna «dziela vostrych adčuvańniaŭ ad ryzyki być złoŭlenym», - cytuje jaho vydańnie Stuff.
Daviedaŭšysia, kali žančyny pojduć u duš, jon uklučaŭ kamiery pultam dystancyjnaha kiravańnia, raspaviali ŭ sudzie. Unačy jon zamianiaŭ butelki z šampuniem i zahružaŭ videa na svoj kampjutar. Paśla raźmiaščaŭ videaroliki na pornasajcie, i zaklikaŭ hledačoŭ pakidać stanoŭčyja vodhuki i zaachvočvać jaho rabić bolš zapisaŭ.
Naviedvalnikam pornasajta jon raspaviadaŭ ab nacyjanalnaści i prafiesii žančyn, a taksama ŭ detalach pisaŭ pra toje, što chacieŭ by ź imi zrabić. Jon taksama raspaviadaŭ pra toje, jak parušaŭ pryvatnaść žančyn bieź ich viedama.
Palicyja Novaj Ziełandyi vydaliła hetyja videa. Advakat mužčyny paprasiŭ sud schavać imia svajho klijenta dziela jaho žonki, jakaja maje prablemy sa zdaroŭjem. Prakurory byli suprać, zajaviŭšy, što: «Jość 34 achviary, samyja patajemnyja fota jakich pajšli pa śviecie».
Mužčynu pryznali vinavatym pa 69 abvinavačvańniach, siarod jakich: vytvorčaść intymnych videazapisaŭ i abraźlivyja publikacyi. Jaho vypuścili pad zakład i kančatkova asudziać u kastryčniku. Jamu pahražaje 14 hadoŭ źniavoleńnia.
