Rasija prypyniła pradastaŭleńnie kredytaŭ Biełarusi i maje namier abmiežavać Minsku biaspošlinnyja pastaŭki naftapraduktaŭ i zvadkavanaha hazu z čaćviortaha kvartała 2018 hoda, spasyłajučysia na straty svajho biudžetu, śviedčać pratakoł źmianieńniaŭ da dvuchbakovaj mižuradavaj damovy i tłumačalnaja zapiska «Biełnaftachima», kopii jakich maje ahienctva Rojterz.
«Rasijski bok inicyjavaŭ spynieńnie praktyki bieśpieraškodnaha vyvazu z Rasijskaj Fiederacyi ŭ Respubliku Biełaruś naftapraduktaŭ, matyvujučy heta stratami rasijskaha biudžetu va ŭmovach pavieličeńnia abjomu ich vyvazu», — havorycca ŭ tłumačalnaj zapiscy da pratakoła źmianieńniaŭ mižuradavaj damovy, padpisanaj namieśnikam kiraŭnika «Biełnaftachima» Andreja Rybakova.
Z hetaj pryčyny «časova zabłakavany pieravod Biełarusi dvuch tranšaŭ kredytnaj linii Jeŭrazijskaha fondu stabilizacyi i raźvićcia, u lipieni 2018 prypynienaja vypłata pa tak zvanym miechaniźmie «pieramytnieńnia», a taksama prypynienaja praca pa pradastaŭleńni u 2019 hodzie Biełarusi dziaržkredytu da $ 1 miljarda».
U dakumiencie adznačajecca, što Rasija čakaje kampiensacyi za pastaŭlenyja raniej u Biełaruś naftapradukty. «Adnaŭleńnie dalejšaha supracoŭnictva … rasijski bok uviazvaje z vyrašeńniem pytańnia pa ŭviadzieńni zabarony na vyvaz naftapraduktaŭ z RF u Respubliku Biełaruś i kampiensacyi strat rasiejskaha biudžetu za raniej vyviezienyja naftapradukty», — adznačajecca ŭ zapiscy Rybakova.
Krynica va ŭradzie Rasii paćvierdziła Rojterzu, što Maskva zakłapočana rostam pastavak naftapraduktaŭ u Biełaruś, ad jakoha cierpić rasijski biudžet. «Vyraśli pastaŭki naftapraduktaŭ u Biełaruś … Pakolki heta biazmytnyja pastaŭki — dla Rasiei heta vypadajučyja prybytki. Ciapier idzie dyskusija, kab unieści niejkija abmiežavalnyja miery dla taho, kab hetuju situacyju vyklučyć», — adznačyła jana.
Ministerstva finansaŭ Biełarusi admoviłasia ad kamientaroŭ, ministerstvy finansaŭ i enierhietyki RF taksama nie stali kamientavać situacyju.
Jeŭrazijski fond uchvaliŭ kredyt Biełarusi na $ 2,0 miljardy ŭ 2016 hodzie. Na hety momant Miensk atrymaŭ piać tranšaŭ na $ 1,6 miljarda i raźličvaŭ atrymać šosty na $ 200 miljonaŭ u kancy minułaha hoda, i siomy, na tuju ž sumu, u pieršym kvartale hetaha. Adnak fond adkłaŭ vydaču šostaha tranšu z-za taho, što, na jaho dumku, Biełaruś nie vykanała ŭmovy jaho pradastaŭleńnia.
U 2017 hodzie RF i Biełaruś damovilisia pra pastaŭku ŭ adras Biełnaftachima 24 miljonaŭ ton nafty ŭ hod u ramkach indykatyŭnaha bałansu, ź jakich faktyčna pastaŭlajecca 18 miljonaŭ ton nafty, a za niedapastaŭlenych 6 miljonaŭ ton Maskva abaviazałasia kampiensavać Minsku vypadajučyja prybytki ad ekspartnaha myta, zhodna z raźlikovym miechanizmam, jaki maje nazvu «pieramytnieńnie».
Asnoŭnaj umovaj kampiensacyjnych vypłat było viartańnie pazyk Maskvie za pastaŭki hazu, jakija nieadnarazova zatrymlivalisia, piša Rojterz.
Novaja viersija mižuradavaj damovy praduhledžvaje ŭviadzieńnie zabarony na ekspart nafty, naftapraduktaŭ i inšych tavaraŭ, jakija pieravyšajuć abjomy indykatyŭnaha bałansu.
Rasieja faktyčna daciruje ŭrad Alaksandra Łukašenki šlacham pastaŭki nafty i hazu pa źnižanych cenach. Najbolšaje finansavaje značeńnie dla Biełarusi majuć pastaŭki nafty i naftapraduktaŭ. Ahulnuju sumu datacyj vyličyć nie prosta, bo suśvietnyja ceny na syravinu vahajucca, ale ekśpierty sychodziacca ŭ tym, što ahułam «datacyja» składaje niekalki miljardaŭ dalaraŭ za hod».
Anałahičnyja kanflikty pamiž Biełaruśsiu i Rasijaj zdaralisia i raniej. Naprykład, šmat šumu było vakoł pastavak ź Biełarusi naftapraduktaŭ na ekspart pad vyhladam rastvaralnikaŭ. Ale kančatkovym vynikam kanfliktaŭ zvyčajna było niaznačnaje źmianieńnie sum datacyj, bo Rasieja maje patrebu ŭ Biełarusi jak u palityčnym i vajskovym sajuźniku i maje svabodnyja finansavyja srodki.
