U sudzie Centralnaha rajona Minska praciahvajecca praces pa spravie Siarhieja Čałaha, piša tut.by

Siarhiej Čały z advakatam pierad pracesam. Fota: Darja Burakina, Tut.by.

Siarhiej Čały z advakatam pierad pracesam. Fota: Darja Burakina, Tut.by.

U źbićci ekanamista i jahonaha siabra Anatola Sakałoŭskaha abvinavačvajuć dvaich mužčyn. Paciarpiełyja prosiać nie pazbaŭlać kryŭdnikaŭ voli.

Abvinavačvanyja — Kirył Doŭnar i Alaksandr Rubloŭ. Pa viersii prakurora, znachodziačysia ŭ stanie ałkaholnaha apjanieńnia, jany źbili ekanamista Siarhieja Čałaha i jaho siabra Sakałoŭskaha.

Pryčynu kanfliktu Alaksandr Rubloŭ rastłumačyŭ tak: jaho žoncy treba było ŭ tualet. Jon paprasiŭ Čałaha z adnym adyści ŭbok, tyja ž vykazalisia niekarektna ŭ adras dziaŭčyny — i pačałosia.

Abvinavačanyja vinu pryznajuć častkova, nie zhadžajučysia z tym, što ŭsio adbyłosia «z chulihanskich pamknieńniaŭ».

Padtrymać abvinavačanych na pasiadžeńnie pryjšli blizkija. Z saboj u ich byli darožnyja sumki i čachoł z vudami. Sprečki pačali krychu paźniej zapłanavanaha, adnak Siarhiej Čały ŭsio roŭna nie paśpieŭ. — Trapiŭ na taksi ŭ avaryju, — zachodziačy ŭ zału sudovych pasiadžeńniaŭ, rastłumačyŭ jon spaźnieńnie.

— Da słoŭ abvinavačanych, što ŭ ich dziejańniach nie było chulihanskich pamknieńniaŭ, varta stavicca krytyčna, — adznačyła padčas sudovych sprečak dziaržabvinavaŭca. U advakata Alaksandra Rublova pazicyja inšaja. — Da słoŭ paciarpiełych taksama varta stavicca krytyčna, — padkreśliła jana. — Usiudy ŭ miedycynskich dakumientach paznačana, što jany ŭ toj viečar znachodzilisia ŭ stanie ałkaholnaha apjanieńnia.

Niahledziačy na heta, dziaržabvinavačańnie prosić pryznačyć Alaksandru Rublovu 3 hady ŭ kałonii ahulnaha režymu, a Kiryłu Doŭnaru — 3 hady papraŭčaj ustanovy adkrytaha typu.

Alaksandr Rubloŭ i Kirył Doŭnar. Pavodle słoŭ dziaržabvinavaŭcy, Rubloŭ raniej byŭ sudzimy za chulihanstva, a Doŭnar «za ździajśnieńnie złačynstvaŭ suprać ułasnaści». Fota: Darja Burakina, Tut.by.

Alaksandr Rubloŭ i Kirył Doŭnar. Pavodle słoŭ dziaržabvinavaŭcy, Rubloŭ raniej byŭ sudzimy za chulihanstva, a Doŭnar «za ździajśnieńnie złačynstvaŭ suprać ułasnaści». Fota: Darja Burakina, Tut.by.

Paciarpiełyja ž prasili nie karać kryŭdzicielaŭ «realnym pazbaŭleńniem voli», ale pry hetym zadavolić ich hramadzianskija pazovy.

Pazoŭ Anatola Sakałoŭskaha — 500 rubloŭ maralnaj škody salidarna z abodvuch abvinavačanych. Siarhieja Čałaha — 5000 rubloŭ salidarna z abodvuch abvinavačanych.

— Jon abhruntoŭvaje heta tym, što paŭtara miesiaca adčuvaŭ bol i dyskamfort, — ahučyŭ pazicyju Siarhieja Čałaha jahony advakat. — Pa fatahrafijach i ŭ apisańni zaklučeńnia ekśpiertyzy vidać, što ŭ jaho mielisia šmatlikija paškodžańni ŭ vobłaści tvaru. Bo jaho dziejnaść źviazana z telebačańniem, jon nie moh źjaŭlacca na pracy.

Ekanamist «doŭhi čas adčuvaŭ fizičny bol», adznačyŭ abaronca, a kali pakazvaŭsia na vulicy, «u jaho byli peŭnyja maralnyja pakuty».

U apošnim słovie Alaksandr Rubloŭ jašče raz paprasiŭ prabačeńnia ŭ Čałaha: «Raskajvajusia ŭ zroblenym».

— U mianie jość žonka, siamja, praca, maje pasłuhi patrabujucca arhanizacyi, — pieraličyŭ jon. — Chaciełasia b nie vybyvać z žyćcia.

Z prabačeńniaŭ pačaŭ apošniaje słova i Kirył Doŭnar. Prasiŭ sud stroha jaho nie karać, kazaŭ, što na pracy jamu prapanavali pasadu i što jon źbirajecca pastupać va ŭniviersitet. Vinu pierad Sakałoŭskim pryznaŭ, adznačyŭšy, što jany z hetaj nahody sustrakalisia i razmaŭlali.

A voś u dačynieńni da pretenzij Siarhieja Čałaha ŭ jaho jość pytańni.

— 5000 biełaruskich rubloŭ… Kali b ja mieŭ takuju sumu, ja b dapamoh dziciaci z ankałohijaj, a nie addaŭ by hetamu čałavieku, — vykazaŭ jon svaju pazicyju.

Pa słovach abvinavačanaha, jany nie raz sprabavali vyjści na kantakt z ekanamistam, ale toj nie pahadžaŭsia.

— Jon choča, kab nas pakarali, i atrymać hrošy za maralnuju škodu, - emacyjna zaznačaŭ Doŭnar. — Jak my bačym u časie sudovaha śledstva, zapyt jaho panski.

Prysud pa hetaj spravie abvieściać u paniadziełak, 13 žniŭnia.

Клас
Панылы сорам
Ха-ха
Ого
Сумна
Абуральна