11 žniŭnia (subota) a 13:00 u miastečku Haradzišča (6 kiłamietraŭ ad kalcavoj, za aŭtarynkam «Malinaŭka») adbudziecca pierapachavańnie Rudolfa Piščały — budaŭnika Piščałaŭskaha zamka, kolišniaha prezidenta hramadzianskaj pałaty Minskaha suda, paviedamlaje Hleb Łabadzienka. Piščałaŭski zamak na siońnia — najvialikšaja pavodle pamieraŭ histaryčnaja pabudova Minska, pomnik architektury.
Peŭny čas tamu moj siabar, historyk Edvard Kananovič na asnovie śviedčańniaŭ stałych žycharoŭ Haradzišča zrabiŭ siensacyjnuju znachodku — nadmahilnyja plity Rudolfa i Safii Piščałaŭ. Dahetul ličyłasia, što nijakaj zhadki pra słaŭny rod Piščałaŭ, jakija vałodali Haradziščam bolš za 300 hod, nie zachavałasia. Plity lažali ŭ kučy śmiećcia na hłybini kala 1 mietra. Tut ža traplalisia i čałaviečyja pareštki. U lipieni 2018 hoda na hetym miescy prajšli raskopki pad kiraŭnictvam znanych archieołahaŭ Siarhieja Tarasava i Andreja Vajciachoviča. Na płoščy kala 25 m.kv. byli znojdzieny pareštki 14 čałaviek. Całkam ačyščanaja ad śmiećcia i daśledavanaja siamiejnaja krypta Piščałaŭ.
Nielha skazać, što Rudolf Piščała — vybitnaja histaryčnaja asoba. Chutčej heta asoba, jakaja zastaniecca ŭ historyi takim voś cikavym čynam — pabudovaj turmy, jakaja atrymała ŭ narodzie jahonaje imia. Adnak znachodka mahiły Rudolfa Piščały — važnaja padzieja dla žycharoŭ Haradzišča i amataraŭ historyi Mienska.
Nadmahilnyja plity byli pačyščanyja, litary abviedzienyja (bo niemahčyma było ničoha pračytać). Miesca dobraŭparadkavanaje našymi z Edvardam siłami, a poruč pastaŭleny vałun z hranitnaj tablicaj — aŭtar Ihar Zasimovič.
Na fota možna pabačyć plity ŭ pracesie dastavańnia ź ziamli; praces raskopak; ciapierašni vyhlad miesca.
11 žniŭnia a 13:00 adbudziecca pierapachavańnie, cyrymoniju praviadzie ksiondz Jury Sańko. Adrazu paśla zajezdu ŭ miastečka ŭzirajciesia ŭ levy bok — tam na pahorku staić vialiki kryž, heta i jość miesca pachavańnia.
Dabracca možna na aŭto (6 km ad kalcavoj, za aŭtarynkam «Malinaŭka»), maršrutkaju www.marshrutka.lpy.by/e/3043-raspisanie-i-shema-marshruta, aŭtobusam.
