Specyjalnaja manitorynhavaja misija ABSE na Danbasie apublikavała videa ź bieśpilotnika, jaki zafiksavaŭ, jak kałony hruzavikoŭ nočču ŭjaždžajuć na terytoryju ŭschodniaj Ukrainy z boku Rasiei i vyjaždžajuć z Ukrainy ŭ miescy, dzie adsutničajuć pamiežna-prapusknyja punkty, piša radyjo «Svaboda».
Pavodle spravazdačy misii, niesankcyjanavany ruch transpartu byŭ zafiksavany ŭ noč na 8 žniŭnia.
Jak vidać na videa, adna kalona ź siami hruzavikoŭ pa hruntavoj darozie, dalokaj ad punktaŭ propusku, zajechała na terytoryju Ŭkrainy. Praź niekalki chvilin inšaja padobnaja kalona z «KamAZaŭ» i «UAZaŭ» pierasiakła rasiejska-ŭkrainskuju miažu, vyjechaŭšy ź niepadkantrolnaj ukrainskamu ŭradu terytoryi Danbasu.
Specyjalny pradstaŭnik Dziarždepartamentu ZŠA ŭ pytańniach Ukrainy Kurt Vołkier prakamentavaŭ videa, jakoje apublikavała Specyjalnaja manitorynhavaja misija ABSE.
«Heta jašče adzin šlach, jakim Rasieja naŭmysna praciahvaje kanflikt i padtrymlivaje bajavyja dziejańni na ŭschodzie Ŭkrainy, niahledziačy na mižnarodnyja namahańni, nakiravanyja na ŭstalavańnie miru va Ŭkrainie», — napisaŭ Vołkier u Twitter.
Vołkier taksama padkreśliŭ, što Rasieja blakuje efektyŭny manitorynh miežaŭ i pieraškadžaje pracy ABSE ŭ hetych rajonach.
«Voś videa naziralnaj misii ABSE, dzie vidać, jak kanvoi hruzavikoŭ niezakonna pierasoŭvajucca pamiž Ukrainaj i Rasiejaj. Nahadvaju, što Rasieja zablakavała efektyŭnuju misiju pa manitorynhu miežaŭ i jaje siły pastajanna pieraškadžajuć vizytam SMM na miažu», — napisaŭ Vołkier.
Kijeŭ i krainy Zachadu abvinavačvajuć Rasieju va ŭzbrojenaj padtrymcy separatystaŭ samaabvieščanych «DNR» i «ŁNR». Kreml abvinavačvańni abviarhaje.
U vyniku kanfliktu na ŭschodzie Ŭkrainy z krasavika 2014 hodu ŭ rehijonie zahinuli bolš za 10 000 čałaviek.
Za apošnija sutki, pavodle dadzienych Kijeva, bajeviki 36 razoŭ parušyli režym spynieńnia ahniu, troje ŭkrainskich vajskoŭcaŭ byli paranienyja.