5 žniŭnia adzin z kiroŭcaŭ Hrodna staŭ vidavočcam niezvyčajnaj situacyi - pierad jaho aŭtamabilem na zabaranialny sihnał śviatłafora darohu žvava pierabieh padletak, za jakim prajšoŭ aŭtamabil DAI z uklučanymi probliskavymi majačkami, a śledam, ale ŭžo bieham, i jašče adzin inśpiektar, piša Błoh Hrodna.
Usie imknulisia za maładym čałaviekam - na piešachodnuju zonu płoščy Savieckaj. Heta trapiła na videa.
Što adbyłosia, AutoGrodno.by patłumačyli ŭ Dziaržaŭtainśpiekcyi.
- Uviečary ŭ minułuju niadzielu narad DAI dziažuryŭ na vulicy Paryžskaj Kamuny, kali mima ich prajechaŭ aŭtamabil Volvo i nie spyniŭsia na sihnał, padadzieny žazłom. Supracoŭniki DAI pačali pieraśled, a lehkavy aŭtamabil paviarnuŭ na vulicu Stefana Batoryja. Na parkoŭcy Volvo spyniŭsia, kiroŭca vybieh i nakiravaŭsia ŭ dvary.
Adzin z supracoŭnikaŭ DAI taksama vybieh za im, a druhi praciahnuŭ pieraśled na aŭtamabili, - raspavioŭ staršy inśpiektar DAI UUS abłvykankama Aleh Duk.
Małady čałaviek prabieh vakoł damoŭ i praz prajeznuju častku nakiravaŭsia na Savieckuju płošču. Mienavita tam jaho i zatrymaŭ inśpiektar, jaki padjechaŭ na aŭtamabili.
- Akazałasia, što kiroŭcu Volvo ciapier 17 hadoŭ. Vadzicielskich pravoŭ jon jašče nie atrymlivaŭ, a mašynu ŭziaŭ u baćki, jaki pravoŭ kiroŭcy pazbaŭleny (za kiravańnie ŭ stanie ałkaholnaha apjanieńnia).
Małady čałaviek vypiŭ paŭtara litra piva i pajechaŭ katacca pa horadzie z dvuma pasažyrami. Jany, darečy, zastalisia kala kinutaha aŭtamabila. U kryvi kiroŭcy vyjavili 0,8 pramile ałkaholu, - dapoŭniŭ Aleh Duk.