Padčas naviedvańnia Oršy kiraŭnik krainy Alaksandr Łukašenka vielmi rezka vykazaŭsia ab pierśpiektyvach ministra prymysłovaści Vitala Voŭka: «U jaho adzin vybar — albo ŭ turmu, albo ŭ Oršu».

U efiry dziaržaŭnych telekanałaŭ prahučała jašče adna fraza, nakiravanaja ministru: «Ad zaŭtrašniaha dnia siudy. Na jakuju pasadu, vyznačym». Atrymlivajecca, što ŭžo ciaham najbližejšych dzion ministr pramysłovaści moža stracić svajo miesca.

Vital Voŭk. Fota sb.by.

Vital Voŭk. Fota sb.by.

Chto ž taki Vital Voŭk? Heta daloka nie samy prykmietny i admietny łukašenkaŭski ministr. Chaj na svajoj pasadzie jon užo bolej za čatary hady, zhadvajuć Vaŭka vielmi redka.

Vital Voŭk naradziŭsia ŭ 1962 hodzie ŭ Kalinkavičach. Hety rajonny centr na Homielščynie admietny vialikaj kolkaściu čynoŭnikaŭ. Adsiul vice-premjer Uładzimir Siamaška, były vice-premjer Anatol Tozik, staršynia Dziaržaŭnaha kamiteta pa standartyzacyi Viktar Nazaranka.

Budučy ministr chadziŭ u škołu №3 horada Kalinkavičy. Ciapier jon štohod naviedvaje jaje padčas subotnikaŭ. Sioleta padaryŭ svajoj škole televizar, a taksama sadžaŭ na padvorku tui.

«Tak, siońnia jość prablema małych haradoŭ, i asabliva małych viosak. I vielmi chočacca, kab hetyja chłopcy i dziaŭčaty mieli budučyniu, pierš za ŭsio, na svajoj małoj radzimie. Nie tolki mahčymaść atrymać adukacyju i dobruju prafiesiju, ale i hodnuju pracu, pabudavać dom abo kvateru. I kab ich dzieci i ŭnuki naradzilisia i raśli na hetaj ziamli. I kali tak składziecca, što jany apynucca udalečyni ad małoj radzimy, to im było b da kaho pryjazdžać siudy», — kazaŭ Voŭk u Kalinkavičach.

U intervju «Sovietskoj Biełoruśsii» ministr krychu raskazvaŭ pra svaje dziciačyja zachapleńni.

«Techniku lubiŭ ź dziacinstva. Asabliva aŭtamabili. Tamu zaŭsiody maryŭ pracavać mienavita na aŭtamabilnym zavodzie. Mianie pa raźmierkavańni chacieli adpravić na «Homsielmaš», bo ja sam z Homielskaj vobłaści. Ale ja ŭsio ž taki raźmierkavaŭsia na MAZ. Tam ja trapiŭ na śpiecvytvorčaść u 1984 hodzie, dzie była vielmi dobraja škoła, vydatnaja sistema padrychtoŭki kadraŭ, vysokaja adkaznaść», — zhadvaŭ čynoŭnik.

Voŭk skončyŭ Biełaruski politechničny instytut pa śpiecyjalnaści «Aŭtamabili i traktary» (1984). Zatym 17 hadoŭ adpracavaŭ na MAZie i Minskim zavodzie kołavych ciahačoŭ.

Papracavaŭ krychu ŭ pryvatnaj śfiery. Ad 2001 da 2006 byŭ hienieralnym dyrektaram «Jukoła-Servis» i «Jukoła-Motars». Paśla hetaha znoŭ viartajecca na Minski zavod kołavych ciahačoŭ. Hetaje pradpryjemstva, darečy, całkam naležyć Vajskova-pramysłovamu kamitetu i maje stratehičnaje značeńnie dla krainy. U 2011 pry pryznačeńni Vaŭka dyrektaram zavoda jaho pradstaŭlaŭ asabista kiraŭnik VPK Siarhiej Huruloŭ.

Naprykancy 2014 hoda Vital Voŭk staŭ ministram pramysłovaści, źmianiŭšy na hetaj pasadzie Dźmitryja Kaciaryniča.

Siabie Vital Voŭk nazyvaje «nie strohim, ale spraviadlivym» kiraŭnikom. «Nie padabajecca mnie, kali čałaviek nie trymaje słova. Asabliva kali heta kiraŭnik. U maim razumieńni takaja rysa nie pavinna być ŭłaścivaja kiraŭniku. Kaliści kupieckaje słova było macniejšym za lubyja sučasnyja damovy. U saviecki čas heta było słova dyrektara. Nie treba było nijakich zahadaŭ, papier», — kazaŭ Voŭk.

Ministr raskazvaŭ, što pracuje šeść dzion u tydzień ad 7 ranicy da 21 viečara. «I biez adpačynku ŭžo try hady. Na zavodzie ŭ nas zaŭsiody nakont adpačynku žartavali. Kali prychodzili padpisvać adhuły, načalnik pytaŭsia, čaho ŭ adhuł pojdzieš — lepš pryplusuj da adpačynku. A potym — navošta tabie adpačynak? Raniej na piensiju vyjdzieš», — śmiajaŭsia Voŭk.

Raskazvaŭ, što jahonaja žonka ciarpliva stavicca da takoha napružanaha hrafiku. Skardziŭsia, što nie zaŭsiody chapała času na vychavańnie dziaciej. Kali Voŭk pracavaŭ na zavodzie ciahačoŭ, to ŭ subotu jeździŭ na bazu adpačynku pad Asipovičami na rybu. A ciapier, maŭlaŭ, času chapaje tolki na toje, kab vyhulać sabaku viečaram.

«Lublu byvać na zavodach. Časam prosta sadžusia ŭ mašynu i jedu hladzieć, chto jak pracuje», — kazaŭ ministr.

Vital Voŭk atrymlivaŭ z ruk Alaksandra Łukašenki Orden Pašany. Padčas jaho pracy ministram vyjšli z kanviejera pieršyja aŭtamabili zavoda «Biełdžy» pad Barysavam. Zrešty, Voŭk anansavaŭ, što moža być stvorany i całkam ułasny biełaruski lehkavy aŭtamabil. Całkam realna, što ciapier hetuju zadaču paručać užo novamu kiraŭniku viedamstva.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?