Dzianis Ivašyn na sudzie
Asnoŭnaje pasiedžańnie pavodle pazovu biznesoŭca Arkadzia Izraileviča suprać hazety «Novy čas» pryznačanaje na 10 vieraśnia, piša Radyjo Svaboda.
U sudzie Savieckaha rajonu Miensku 29 žniŭnia prajšło pieršaje pasiedžańnie pavodle pazovu, ale jano chutka zaviaršyłasia — sam pazoŭnik nie pryjšoŭ. Sud pastanaviŭ abaviazać Arkadzia Izraileviča prysutničać i da 4 vieraśnia ŭdakładnić patrabavańni ŭ pazovie.
Ad «Novaha času» na pracesie prysutničali redaktarka Aksana Kołb, žurnalist Dzianis Ivašyn dy ichnyja abaroncy. Usie abvinavačańni na svoj adras jany adkidajuć.
Pazoŭ ab abaronie honaru, hodnaści i dziełavoj reputacyi Izrailevič padaŭ na pačatku žniŭnia. Jon patrabuje ad niezaležnaha vydańnia 40 tysiač rubloŭ za «maralnuju škodu». Jašče tysiaču rubloŭ jon choča atrymać ad žurnalista Dzianisa Ivašyna, aŭtara raśśledavańnia pra niezakonnuju zabudovu ŭ Kurapatach.
Jak ličyć Izrailevič, z hazetnych artykułaŭ vynikaje, što jahonaje TAA «IV» źjaŭlajecca beneficyjaram budaŭnictva pobač ź miescam stalinskich rasstrełaŭ u Kurapatach restaracyi «Pojediem pojedim», suprać dziejnaści jakoj pratestujuć hramadzkija aktyvisty.
Jon śćviardžaje, što nia maje nijakaha jurydyčnaha dačynieńnia da zabaŭlalnaj ustanovy, i patrabuje apublikavać źniapraŭdžańnie — infarmacyju pra svaju niedatyčnaść da realizacyi kamercyjnaha prajektu, a taksama damahajecca materyjalnaj kampensacyi za «emacyjnyja pieražyvańni i paharšeńnie fizyčnaha stanu».
