Alaksandr Koržyč u vojsku, archiŭnaje fota
U Mienskim abłasnym sudzie na pracesie pa fakcie śmierci ŭ Piečach sałdata Alaksandra Koržyča zasłuchali śviedku Andreja Zajca, byłoha siaržanta, kamandzira ŭzvodu, jakomu byŭ padnačaleny Koržyč. Mienavita Zajac pieršym ubačyŭ miortvaha Koržyča, na sudzie jon raspavioŭ, jak heta było, piša Radyjo Svaboda.
Andrej Zajac ciapier adbyvaje pakarańnie ŭ babrujskaj kalonii №2. U traŭni 2018 hodu Zajac byŭ asudžany za złoŭžyvańnie ŭładaj, atrymaŭ try hady pazbaŭleńnia voli.
Śviedki na pracesie ŭ Mienskim abłasnym sudzie raskazvali, što jon ździekavaŭsia z Koržyča i vymahaŭ u jaho hrošy.
«Ubačyŭ sinija ruki»
Andrej Zajac 3 kastryčnika 2017 hodu znajšoŭ cieła Koržyča ŭ padvale budynku medyčnaj roty.
«Koržyč prachodziŭ z traŭnia pa červień kurs maładoha bajca, ja byŭ kamandziram jaho ŭzvodu, — raskazaŭ Zajac na dopycie. — Bolš mnie niama čaho dadać. Ničym asablivym jon siabie nie prajaviŭ».
Zajac raskazaŭ, što padčas słužby ŭ Piečach vioŭ dziońnik, kudy «zapisvaŭ svaje dumki». Ź jahonych słovaŭ, pra Koržyča tudy jon ničoha nie pisaŭ.
«Koržyča ja znajšoŭ, kali stajaŭ u naradzie na paście kantrolu na ŭjeździe ŭ medyčnuju rotu, — raskazaŭ Zajac. — Zvyčajnaja słužba ŭ naradzie. Pierad tym jak jaho zdać, ja pajšoŭ u padvał, kab uziać instrument (kab paradkavać na paście). I ŭbačyŭ tam čałavieka, jaki visieŭ. Ubačyŭ, što jaho ruki sinija. Značyć, jon byŭ miortvy.
Viarnuŭsia nazad i źviazaŭsia ź dziažurnym z medyčnaj roty. Kali jon prybyŭ, ja advioŭ jaho tudy ŭ padvał. Potym my vyjšli, dziažurny pačaŭ zvanić načalnikam. Vyklikali ŭsich. Pryjechaŭ SK z Barysava, mianie dapytali. Paśla hetaha adpuścili. Bolš ničoha nie mahu raskazać».
Zajac zajaviŭ, što ŭ dačynieńni da Koržyča nia mieŭ pazastatutnych adnosinaŭ, asudžany byŭ za inšyja złačynstvy. Taksama śviedka skazaŭ, što nia viedaŭ Koržyča da słužby (jany z zahinułym sałdatam mieli ahulnych znajomych u Salihorsku, adkul rodam Zajac).
Padčas dopytu vyśvietliłasia, što ŭ pamiaškańni, dzie znajšli cieła Koržyča, nie było śviatła (siaržant Zajac karystaŭsia lichtarykam mabilnaha telefonu). Jano znachodzicca prykładna za 10-15 metraŭ ad uvachodu. Kab trapić tudy, treba spuścicca jašče adnoj leśvicaj. Dźviery nievysokija, kab zajści ŭ pamiaškańnie, treba prysieści.
Andrej Zajac raskazaŭ, što ŭ Koržyča ruki nie byli źviazanyja. Hałava była nakrytaja, na padłozie lažali papruha i šapka. Pobač z trupam nie było niejkich usłonaŭ albo padstavak.
Siaržant Zajac sprabavaŭ učynić suicyd
Jak raskazaŭ na pracesie inšy śviedka ź liku byłych siaržantaŭ — Ernest Subocki — siaržant Zajac padčas słužby ŭ Piečach mieŭ kiepskuju reputacyju.
«Zajca ličyli dziŭnym, — raskazaŭ Subocki. — Havaryli, što jon chvory na ŭsiu hałavu. Moh padniać svaju rotu pasiarod nočy, pažadać usim «Dobraj nočy» i zahadać znoŭ spać. Havaryli, što Zajac biŭ Koržyča, vymahaŭ u jaho hrošy».
Pavodle Subockaha, jaho vielmi ździviła, što mienavita Zajac znajšoŭ trup Koržyča.
«Zajac nikoli nie chadziŭ u padvał medroty. Jon raskazvaŭ, što šukaŭ tam vienik, ale vieniki ŭ inšym miescy. Vypadkova ŭ miesca, dzie znajšli Koržyča, nielha trapić».
Taksama Subocki raskazaŭ, što padčas znachodžańnia ŭ medyčnym punkcie Koržyč niejki čas byŭ u adnoj pałacie z Zajcam. Paśla hetaha jaho nastroj rezka źmianiŭsia, Koržyč pačaŭ «panična bajacca» zastupać u narady ŭ medpunkcie adzin.
Abvinavačany Baranoŭski raskazaŭ, što ŭžo paśla zatrymańnia byŭ śviedkam sproby samahubstva Andreja Zajca.
«My jechali z dopytu ŭ spravie Koržyča, — raskazaŭ Baranoŭski. — Zajac byŭ u adnoj mašynie sa mnoj. Jon dastaŭ adniekul ihołku i pasprabavaŭ zasunuć jaje sabie ŭ vienu. Jaho spynili aficery».
Sam Zajac nie admaŭlaje hetaha ŭčynku, adnak nazyvaje jaho vypadkovaściu.
***
Sud pa spravie Koržyča. Koratka
Abvinavačanymi ŭ «spravie Koržyča» pryznanyja troje siaržantaŭ ź jahonaj roty, jakija, pavodle śledztva, daviali sałdata da samahubstva. Antona Viaževiča i Jahora Skuratoviča vinavaciać va złoŭžyvańni ŭładaj, atrymańni chabaru i pieravyšeńni słužbovych paŭnamoctvaŭ. Jaŭhiena Baranoŭskaha ŭ dadatak da hetaha ŭ kradziažy.
Maci Alaksandra Koržyča Śviatłana ličyć, što jaje syn staŭ achviaraju zabojstva. Pryčynaj złačynstva, pierakananaja jana, stała niežadańnie syna płacić siaržantam hrošy za znachodžańnie ŭ medyčnaj rocie. Sasłužyŭcy zahinułaha sałdata, apytanyja prakuroram i sudździoj, taksama nia vierać u samahubstva.
Paciarpiełymi ŭ spravie, akramia svajakoŭ Alaksandra Koržyča, pryznanyja bolš za 50 jaho byłych sasłužyŭcaŭ.
