Pieršy vypadak hniezdavańnia pčały, asy i vaviorki ŭ čałaviečych pareštkach apisali navukoŭcy z polskaha Vrocłava na staronkach časopisu «Forensic Science International», paviedamlaje Biełsat.
«Nichto raniej nie mieŭ mahčymaści apisać vypadak hniezdavańnia hetych vidaŭ žyviolinaŭ unutry čałaviečych reštak», — kaža Marcin Kadej ź Instytut bijałohii asiarodździa Vrocłaŭskaha ŭniviersitetu.
Cieła znajšli vypadkova ŭ 2016-m na adnoj ź jalinaŭ u polskaj Nižniaj Silezii, na vyšyni 25 mietraŭ nad ziamloj. Imavierna, mužčyna skončyŭ žyćcio samahubstvam. Kali reštki dastavili na kafiedru sudovaj ekśpiertyzy Vrocłaŭskaha ŭniviersitetu, ekśpierty znajšli ŭ im hniozdy zvyčajnaj asy, miedanosnaj pčały i zvyčajnaj vaviorki.
Mužčyna mieŭ na sabie dźvie pary štanoŭ. Heta dapamahło pieraduchilić defrahmientacyju cieła. Fota — Science Direct
Cieła pravisieła na drevie ažno 13 hadoŭ — i zachavałasia ŭ dosyć dobrym stanie, bo častkova mumifikavałasia. Pavodle vučonych, heta adbyłosia dziakujučy niekalkim faktaram.
Pa-pieršaje, cieła nie mieła kantaktu ź ziamloj, dzie b jaho mahli źjeści lisy abo barsuki.
Pa-druhoje, atmaśfiernyja ŭmovy ŭ kronie dreva adroźnivajucca ad tych, što panujuć niepasredna kala ziamli — heta mieła vialiki ŭpłyŭ na toje, jak raskładałasia cieła ciaham hadoŭ.
Treciaj pryčynaj byŭ fakt, što cieła znachodziłasia ŭ viertykalnaj pazicyi — heta, kažuć navukoŭcy, upłyvaje na ściakańnie ŭsich vadkaściaŭ u arhaniźmie i pracesy raskładańnia.
Čarhovym faktaram było toje, što mužčyna mieŭ na sabie dźvie pary štanoŭ, jakija stali daskanałym barjeram ad upłyvu nadvorja na pareštki i ŭtrymlivali cieła ad raspadu.
Adkryćcio nie daje šmat sudovaj entamałohii: pčoły, vosy i vaviorki nie naležać da žyviolinaŭ, jakija niepasredna ŭdzielničajuć u raskładańni ludskich ciełaŭ. Ale, pavodle bijołahaŭ, znachodka daje mahčymaść pa-novamu pahladzieć na pavodziny hetych vidaŭ.
«My šmat viedajem, dzie jany žyvuć, jak raźvivajucca, što im daspadoby, ale hetaje adkryćcio pakazvaje nam, što ludskija pareštki mohuć być dla ich domam u vypadku, kali adpaviadajuć patrabavańniam hetych žyviolinaŭ», — dadaje Marcin Kadej.
Adkryćcio pakazvaje, što žyvyja arhanizmy va ŭmovach naturalnych ekasistemaŭ vykarystoŭvajuć lubuju aptymalnuju dla siabie mahčymaść, kab zasialić dasiažnuju dla ich u peŭnym časie i miescy prastoru.
