U miljonaŭ hulcoŭ World of Tanks źjaviłasia mahčymaść virtualna naviedać Minsk i pavajavać adzin z adnym u centry horada. Pra toje, jak stvarali kartu stalicy dla najpapularnaj kampjutarnaj hulni i nakolki dakładnaj jana atrymałasia, karespandent ahienctva «Minsk-Naviny» hutaryła z mastackim supiervajzieram Minskaha centra raspracoŭki World of Tanks Michaiłam Rytvinskim.

— Karta Minska ŭ hulni — daŭniaja mara, jakuju chaciełasia ažyćciavić, — kaža Michaił. — Da jaje raspracoŭki prystupili jašče ŭ 2013 hodzie, ale potym realizacyja prajekta prypyniłasia i adnaviłasia vosieńniu 2017 hoda.

Praces padrychtoŭki zaniaŭ krychu bolš za paŭhoda, zatym išło testavańnie, a ciapier, napiaredadni čarhovaha Dnia horada i hrandyjoznaha Dnia tankista virtualny Minsk staŭ dastupny hulcam World of Tanks.

Surazmoŭca ŭspaminaje: kab uznavić abličča stalicy maksimalna realistyčna, vychodzili na miesca, fatahrafavali budynki, dvary, vyvučali histaryčnyja fota ŭ knihach, internecie, ŚMI… Častku horada, jakaja paśla trapiła na kartu, rańniaj zimoj zdymali z kvadrakoptara, kab pahladzieć źvierchu strukturu vulic i dvaroŭ. Nad stvareńniem karty pracavali kala 45 čałaviek.

— Raspracoŭka karty dzielicca na dva etapy — tłumačyć Michaił. — Na pieršym supracoŭniki, jakija adkazvajuć za hulniavy praces, stvarajuć schiematyčny makiet z łandšaftam miascovaści. Kali hetaja častka hatovaja, mastaki jaje ŭpryhožvajuć: dadajuć abjekty, tekstury, nie źmianiajučy ŭžo stvoranaj na pieršym etapie struktury. Isnujuć i standarty pa pamierach hulniavych kart. Naprykład, dla advolnych bajoŭ jana nie moža być bolš čym 1×1 km.

Mienavita ŭ takim maksimalnym pamiery i pradstaŭlena karta Minska, ale terytoryja, jakaja na joj adlustravana (umoŭna jaje možna ŭpisać u miežy vulic Maksima Bahdanoviča, Pieršamajskaj, Janki Kupały i płoščy Pieramohi), bolš. Uličvajučy ŭsie hetyja niuansy, pryjšłosia niekalki adyści ad realnaj tapałohii miascovaści. Tak, park Horkaha na mapie staŭ vužejšym, čym u žyćci. Niekatoryja dystancyi pryjšłosia skaracić, kab upisacca ŭ farmat.

Padpravili i abličča dvaroŭ. Pakolki heta miesca, dzie, jak zapłanavana, budzie prachodzić vialikaja častka hulniavoha pracesu, łandšafty pryjšłosia dzie-nidzie zhładzić, kab jany stali lohka pieraadolnymi dla tankaŭ.

— U žyćci hetaja zona absalutna nieprydatnaja dla prajezdu takoj vajskovaj techniki — adznačaje surazmoŭca. — Navat arki, praź jakija možna trapić u dvary, u realnaści zanadta maleńkija dla samaha vialikaha tanka. Ale ŭ cełym dakładnaść karty vielmi vysokaja.

Darečy, pry bitvach ŭ virtualnym Miensku značnyja razbureńni horada niemahčymyja. Paciarpieć mohuć tolki aharodža, aŭtamabili, kijoski. Na inšych kartach draŭlanyja chatki taksama možna razbambić, ale ŭ Minsku takoj funkcyi niama: dom-muziej I źjezda RSDRP, choć i ŭjaŭlaje saboj draŭlanuju pabudovu, bieśśmiarotny.

Ci acanili karystalniki novuju kartu? Michaił kaža, što asabliva pazityŭna jaje ŭsprymajuć hulcy-minčanie albo tyja, chto byvaŭ u našym horadzie. Jany paznajuć znajomyja miescy, nastalhujuć. Mahčyma, dla inšaharodnich i zamiežnych «tankistaŭ» hety pradukt stanie padstavaj naviedać biełaruskuju stalicu i, špacyrujučy pa horadzie, uspaminać bai, praviedzienyja ŭ jaho virtualnaj kopii.

Darečy

Pieršapačatkova, stvarajučy kartu Minska dla World Of Tanks, raspracoŭščyki pasprabavali vykarystoŭvać terytoryju Trajeckaha pradmieścia, uznaviŭšy ŭsio, jak było ŭ vajennyja hady. Adnak dla hulniavoha pracesu jana akazałasia nie vielmi zručnaj. Tady źviarnulisia da zony kala čyhunačnaha vakzała — vynik byŭ tym ža. Važna było bačyć na karcie viadomy Minsk, a pakolki ŭ časy Druhoj suśvietnaj vajny rajon ciapierašniaj płoščy Pieramohi, adlustravany na vynikovaj karcie, źjaŭlaŭsia uskrainaj z draŭlanymi chatkami, to vyrašyli «pieramatać» čas napierad i adlustravać epochu 1970-ch.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?